Serchhip | 20th June, 2022: Vawiin khan Serchhip District Disaster Management Authority Chairman, Pi Nazuk Kumar, IAS, Serchhip bawrhsap ni bawk chuan tun hnai ruahsur nasa vanga Serchhip leh a chhehvela leiminna hmun hrang hrangte a tlawh kual.
Pi Nazuk Kumar hian Chhiahtlang atanga bul tanin Chhiahtlang NH54 Bypass Road Retaining Wall chimna laite, Serchhip leh Chhiahtlang inkara kawng laihzauh vanga leiminna te a en a, chumi hnuah Serchhip P&E venga lei minna hmunte, Serchhip Dinthar venga NH54 kawngpui tlahniam thar te leh Dinthar Veng hmun thenkhat panna leiminin a hnawhpinte, Darnam venga Telecommunication Tower panna kawng laihna leivung tawlhin NH54 a hnawhna hmun te leh he leimin vanga Pu Thanghnuna in thiah tak hmunte a tlawh a. Pu Thanghnuna hi Sailiam kohhran Presbyterian Biakin Chokaah a invawm lut rih a ni. Tin, Sailiamkawna Horticulture Department Ware House leh Cold Storage sira leiminin an Power line a tihchhiatte, an Ware House building dinhmun him lo deuh nia langte a en bawk a ni.
Heng harsatna thlenna hrang hrangte hi a tam zawk chu NH54 laih zauh hna thawh mekin a nghawngte an nih hlawm avangin Pi Nazuk Kumar hian NHIDCL hotute chu a rang lama a theih ang ang thianfai turin a hrilh a, chawp leh chilha a invenna hna thawh theih ang angte chu a ranglama umzui a nih tur thu sawiin, Horticulture Department Ware House bik chu Horticulture hotute nena hmalak zui zel dan tur sawiho a tum thu a sawi bawk a. Silpauline a khuh hul tulna hmun te hnenah Silpauline an pe nghal bawk a ni.
Pi Nazuk Kumar hi Pu Lalmuansanga Ralte, Addl. DC, Pu Kaste Romalsawma, SDPO,Pi Lalzikpuii, SDO, Sadaar, Pi Vanlalduhi Ralte, DM& R District Organiser, NHIDCL hotute leh an hnuaia Contractor te leh mi pawimawh dangten an tawiawm a ni.
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
- DIPR
Post a Comment
He post chungchanga i ngaihdan lo sawi ve rawh: