Food, Civil Supplies & Consumer Affairs Minister-in consumer ten online a complain an thehluh theihna tur web portal ‘e-Daakhil’ hawng

Aizawl, 20th June, 2022 : Food, Civil Supplies & Consumer Affairs Minister Pu K. Lalrinliana,  chuan vawiin khan a pisa-ah consumer ten online a complain an thehluh theihna tur web portal ‘e-Daakhil’ edaakhil.nic.in a hawng.

 

He hunah hian Supply Minister Pu K. Lalrinliana chuan Consumer ten an thil lei leh dawnah lungawilohna an neih changa awlsam taka an thlen theihna tur web portal hman theiha ruahman a ni chu lawmawm a tih thu a sawi a, consumer te chanvo humhalh nan tangkai taka hman theih tura hman nuam taka siam a ni a, smart phone nei tan pawh an mobile phone atangin awlsam takin complain an thehlut thei dawn tawh a ni, a ti a. Online a complain thehluh theihna hi kum 2020 kumtawp lam atang tawh khan Sawrkarin a buaipui tan a, COVID-19 te leh rokhawlhna dang dang a lo awm ve avangin a puitling lawk thei lova, nimahsela theihtawp chhuah a nih hnuah a lo puitling ve ta a ni, a ti.

He web portal hlawhtlinna atan hian State Bank of India nen MoU sign a nih thu sawiin Minister chuan SBI Guwahati-ah MoU hi an thehlut a, Guwahati lam hian SBI Corporate Centre Mumbai-ah an thawn thla ve leh a. Mumbai lam hian merchant user ID leh merchant key a lo generate ve leh ta a. Merchant key leh User ID te hi Govt. Of India a E-Daakhil Team te hnenah pe ve lehin anni hian pawisa pekna kawng, payment gateway kha a tlang tha em, complaint fee kha a luhna tur hmunah a lut thei em tih an han endik ve leh a. Chumi hnuah chauh chuan he online system hi hman theihin a lo awm ta a ni, a ti.

Minister chuan he online payment system buaipuina kawngah hian a tir atangin NIC, Mizoram hian min buaipui a, NIC leh Department of Consumer Affairs, Govt. of India tangkawpin scheme an siam CONFONET hian Mizoram pawh e-Daakhil lo puitlin theihnan hian theihtawp an chhuah avanga a lawm thu a sawi bawk a ni.

Consumer te zingah complain tur nei te chuan he portal edaakhil.nic.in ah hian luta in registerin an complain a thehluh theih a ni. Complain thehluh hi Consumer Commission lam tan pawh bawhzui zung theih tura duan a ni bawk.

Consumer Commission a thubuai thehluh te lo chingfel tur hian President leh Member te district tinah lak an ni tawh a ni. State Commission-ah hian President leh Member pali neiin an awm a, District Commission-ah hian President leh Member pahnih neiin an awm bawk a ni.

State Commission hian a din tirh atangin case 253 dawng tawhin, case 237 an chingfel tawh a, chinfel hmabak pending case hi 16 an nei a ni. District Commission-ah chuan district zawng zawng khaikhawmin, din tirh anih atangin case 4388 dawn a ni tawh a, heng zinga case 4354 hi chinfel tawh niin, pending case hi 37 a awm mek a ni. Pending neih mekna hi Aizawl district-ah chauh a ni.

Online a complaint thehluh hi mipuiin an hman tangkai thiam chuan district hrang hrangah te hian consumer case hi a pung chho in a rinawm.

E-Daakhil hi Common Service Centre te nen thlunzawm tawh a nih avangin hmun kilkhawra awmte tan pawh he centre kaltlang hian complaint a theluh theih dawn bawk a ni. Consumer in a thubuai neih hlut zawng atanga chhutin cheng nuai nga hnuai lamah chuan complaint fee pek a ngai dawn lova, nuai nga chin chunglam chauh hian fee hi pek a ngai ang.

Pi Lallianmawii, State Informatics Officer, NIC in technical report a pein, Pu David Lalthantluanga, Secretary i/c Consumer Affairs, Pu K. Lalrohlua, Joint Secretary, Pu V. Laldinsanga, Registrar, State Consumer Disputes Redressal Commission leh Mizoram Consumers’ Union lam atang tein he launching function-ah hian an tel a. Tin, District dang atang hian Zoom Apps atangin DCSO te, District Commission Member-te leh CONFONET staff, Data Management Assistant te an lo tel bawk a ni.

 

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]

 

 

- DIPR