Ticker

10/recent/ticker-posts

SCHOOL EDUCATION MINISTER-IN HSSLC RESULT 2022 CHHUAK LAWMAWM A TIH THU A SAWI

Aizawl | June 1, 2022: School Education Minister Pu Lalchhandama Ralte chuan Mizoram Board of School Education (MBSE) buatsaih HSSLC Examination 2022 result nimina (Ni 31.05.2022) tihchhuah a ni ta chu lawmawm a tih thu a sawi a. Hripui leng kara HSSLC Exam hlawhtling taka buatsaih anih theih nana thawktute, hmun hrang hranga task force te, District thuneitute, zirlaite, nu leh pate leh Zoram mipuite chungah lawmthu a sawi a, kan zavaia tanrualna avangin hlawhtlinna kan hmu a ni a ti a. HSSLC result chhuah anih theihna atana rim taka thawktu MBSE a thawk te leh HSS lecturer-te hnenah lawmthu a sawi bawk.

Minister chuan kum 2020 atangin Covid-19 hripuiin min tibuai a, khawvel pum kan buai a, he kum thum kalta chhung hian Mizoram zirna chu a theih ang angin sorkarin a kalpui a, class pangngai nei lovin online class te kalpui a ni a ti a. Kumina Board Exam hmachhawnte hi regular class kal nan thla hnih/thum vel chauh hun nei an ni a, an tan exam tura inbuatsaih a hautak hle a ti a. Hetianga class pangngai nei mumal lova exam hmachhawn an ni chung hian zaa 82.07 zetin an passed thei chu lawmawm a tih thu leh zirlai hlawhtlingte chu thinlung taka a lawmpui thu a sawi. An kal zelna turah Mizo hnam tana chhawr tlak hlawhtlinna paw chhuak ngei tura a duhsak thu a sawi. Exam beitu zaa 17.93 te chu an hlawhtling zo ta lo tih sawiin heng vanduai tate hi a tuarpui thu leh an hlawhchhamna chu tumruhnaah hmang se a duhsak thu a sawi a. Hlawhchhamna phenah hlawhtlinna a awm tih hria se, zirna chawlhsan mai lova tumruhna leh taimakna thar nen zirna hmachhawn zel tura a duhsak thu a sawi bawk.

Minister chuan HSSLC Result tihchhuahah hian Arts stream-ah za-ah za passed school 56, Science-ah school 6, Commerce-ah school 3 an awm a, Nil school an awm lo te chu a lawmawm hle a ni a ti a. Hripui leng kara Zirtirtute inpekna lo lang chu lawmawm a tih thu a sawi bawk.

- DIPR
Post i hmuh dan

Post a Comment

0 Comments