Manipur-ah Zofate ram nêk hi ZORO chuan a ngai thutak hle

Aizawl | June 1, 2022: Zo Re-unification Organisation (ZORO) chuan nimin khan Aizawl Press Club-ah thuthar thehdarhtute kawmin, "Manipur-ah Zofate ram nêk hi Zo Re-unification Organisation (ZORO) chuan a ngai serious hle a; hetianga Zofate nêkna rêng rêng chu a dodal tlat zêl dawn a ni." an ti.


ZORO chuan, "Manipur state-ah hian Zofa tam tak an chêng a, anni hi hma khawsang aṭanga helai ram luahlum hmasatute, a ram neitu dik tak (indigenous people) an ni. An ram hi an luh hmain Meitei ram a ni ngai lo, British-in Meitei nen awpkhâwmin Manipur hnuaiah a dah a, British an chhuah hnuah Manipur hnuaiah an awm chhunzawm zêl avangin an awmna ram hi Meitei ram a ni ngawt lo, an ram hi tuma chhuhsak theih a ni lo. Manipur awp Zoram ah Zofate an cheng zui zel a ni zawk." an ti a.


"Manipur state chhunga Zofate ram engemawzât chu sorkarin chhuhsak tuma finrawl chhuaha reserved forest-ah a puang hi India dân kalh a ni a, United Nations Declaration on the Rights of Indigenous Peoples (UNDRIP) article 10 bawhchhiatna a ni bawk. Hetianga Zofate ram nêk hi Zo Re-unification Organisation (ZORO) chuan a ngai serious hle a; hetianga Zofate nêkna rêng rêng chu a dodal tlat zêl dawn a ni. ZORO hi khawvel hmun hrang hranga Zofate tâna ding a ni a, Zofate chanvo chhuhsak a remti ngai dawn lo. An chanvo dik an hmuh theih nân leh an dikna tlangaupuina tûrah chuan theihtawp chhuahin a ṭang zel dawn a ni." tiin ZORO chuan an sawi.

Chuvangin, Manipur sorkarin Zofate ram chhuhsak tuma finrawl tinrêng hmanga chêt a lâkna huaisen taka dodâl a, social media hmanga thu thehdarhtu Dr. Mark Thangmang Haokip hi a fakawmin a chhuanawm takzet a ni.  Manipur sorkarin a man a, a hrengbet hi ZORO chuan a dem takzet a, rang taka thu delhkilh awm miah lova chhuah zalên nghâl turin a phût a ni.

Post a Comment

0 Comments