PRESBYTERIAN KOHHRAN LEH A ZIA

(PRESBYTERIANISM)

- K. Remruatfela

Vawiin i.e. ni 12 June, 2022 (Sun) tlai khan Upper Republic Branch KTP te chuan fellowship hunah sharing hun kan hmang a. Chumi sharing huna ‘Presbyterian Kohhran leh a Zia’ ka sawi tlangpuite chu member tam zawkte chhiar theih turin tihian han chhawpchhuak ila:

1. Kristian Kohhran Hlawm Thum Te:
Siamthat rawngbawlhna thawktute kan tih mai thin Martin Luther te, Zwingli te, John Calvin leh mi dang dang ten Roman Catholic inkaihhruai dan an hnawl a, Kohhran siamthat hna an thawh khan rawngbalwtu nghet siam kha an thupui hle a. Hetihlaiin Kohhran siamthat hmaa an kal dan kha tha la ti pawl an la awm tho bawk a. Hei hian nghawng thalo a neih zinga pakhat chu Kohhran pawl (Denomination) hrang hrang lo piangchhuak ve hi a ni. Chuvangin siamthat hnu atang khan khawvel Kristian Kohhran pawl hrang hrangte hi hlawm thumin an then ta a. Chungte chu Presbyterian kalphung hriatchian nana a pawimawh avangin han târlang reng reng ila:-

(a) Prelacy (Episcopal Church):
Hotu bik nei Kohhran – Roman Catholic Kohhran te, Orthodox Kohhran te, Marthoma Kohhran te hi hemi huangchhuanga tel te chu an ni a. Kohhran inkhawm a urhsun leh a puithu ang bera kaihhruai duh tu te an ni. Tin, Kohhran inrelbawlna kawng reng rengah pawh an duhfirin an duh urhsun angreng hle a. Kohhran chetvelna kawngah an Puithiamten thuneihna sang tak an nei.

(b). Congregationalist Kohhran Te:
Congregationalist kan tih hote chu Roman Catholic, Orthodox, Episcopal, Methodist leh Presbyterian tih loh ho zawngte hi an ni a. Mipui dah pawimawh a, democracy uar tute an ni. Isua Krista chu Kohhran lal ber leh hotu a nihna behchhanin tualchhung Kohhran thuneihna an dah pawimawh hle. Pathian biak inkhawm up tak leh urhsun taka kalpui hi tul an ti lem lova. Zalen taka Pathian biak leh fak thupui bera neitute an nih avangin an boruak a zangkhaiin, an kaldanah fellowship zia an chhawm nasa hle.


(c). Presbyterian Kohhran:
Rawngbawltu mimal thu ni lova, Inkhawmpui indawt chhawnga Minister leh Upaten ro an rel hona a ni a. John Calvin-a duan Kohhran kalphung zuitute an ni. Pathian biak inkhawm leh serh leh sang inkaihhruai dan kawngah Prelacy leh Congregationalist te inkara awm a ni a. Kohhran inkhawm up lutuk si lo, zangkhai lutuk bawk si lo, a inkar velah Presbyterian Kohhran chu a kal thin.


2. Presbyterian Kohhran Zia Chu Eng Nge Ti Ta?
Presbyterian Kohhran chu thuneitu bik awm lova, inrâwn tlânga, sawihona atanga thu ti tlu chauh thin an nih avangin Inkhawmpui Kohhran emaw Committee Kohhran ti pawha sawi fiamthu an hlawh phah reng thin. Pastor hmasa Rev. Saiaithanga chuan, _“Pathian biak inkhawm hi Kohhran thlarau lam chawhlui a ni a, Kohhran nunna atan a pawimawh em em a; chuvangin urhsun tak leh zah taka tih tur a ni. Chu chu Presbyterian Kohhran zia diktak pawh a ni e.”_ a ti a. A sawi zui zelnaah, “Mizoram Presbyterian Kohhran inkhawm hi a urshun lo hle a. Hei hi avang pakhat chu a tir lama kan thahnemngaihna, tam thuai thuai duhna vangin fimkhur leh uluk lam hi kan lo thlahthlam hman deuh a ni awm a. A tam lama thahnemngaihna vanga kan tihfelohte chu tunah tihfel a hun ta hle a ni”, a ti a.

A chunga kan Pastor hmasain a sawi khian Presbyterian Kohhran zia chu a tarlang chiang hle a ni.  Kohhran dang – Roman Catholic leh Orthodox Kohhran thenkhatte chu an Pathian biak inkhawm kalpui danah an duh fir uchuak avangin, kawng lemlamah chuan vai Pathian bia an ang lek lek thinin a lang a. Chutihlai erawh chu Kohhran dang – UPC leh Baptist Kohhran te chuan zalenna an ngaih pawimawh luatah an inkhawm dan kalhmang a dahlauvin, Community Hall vela inkhawm an ang lek lek thinin a lang lehthung a. Chutiang karah chuan Presbyterian Kohhran chuan fimkhur leh uluk takin tak leh un ngui si lo, zalen leh dahlau lutuk si lovin zahawm takin inkhawm a kaihruai thin a. Kohhran serh leh sangte a ngai pawimawhin, Dan tlawhchhana inrelbawlna te a ngaisang em em a ni. 

3. Eng Hi Nge Kan Dinhmun Ni Chiah?
Kohhran humhimtu ropui, Rev. Saiaithanga`n tam thuai thuai duhna vanga fimkurna lam kan lo hlamchhiah deuh mah mah hman a lo tih ang deuh khan Mizoram Presbyterian Kohhran te hian a tir lama thahnemngaihna vanga fimkhurna chang kan lo hriat tawk loh vang hian kan Kohhran zia hi kan hloh nasa hman tawh hle a ni.

Piantharna kan inhrilhfiah danah te, Chhandamna kan dawnsawn danah te leh kan Pathian biak kalphungah reng reng mikhual theology kan la nasa tawh hle a. Hlim lam lawmna kan uar tak deuh deuh avangin Presbyterianism kan kal kalpel tep tawh a ni. Kan hruaitu hmasa te lah mipui hip ngaihna vanga an duh ang taka Kohhran an lo awp theih thin loh avangin Kohhran mipuite thinlungah Presbyterian kalphung hrelo nu leh pa, rawngbawltu kan pungchho tan tial tial niin a lang a. A hun leh a hmun mila hla sak te, Kohhran inkhawm zahawm taka kalpui te leh mumal taka inkaihhruaite kan kalpensan tial tial tan a. Kan Pathian biak inkhawm danah reng reng Worship service ai mahin fellowship zia a pu lek lek zawk tawh a. Camping zawh hlim vanglaia Kohhran inkhawm kalpui dante phei chu Vanapa Hall a inkhawm te a ang rum rum ta mai.

Tun dinhmunah chuan Kohhran mi nghet inti ve si, Kohhran doctrine hre mumal lo, Kristian Hlabu a hla sak theih nei mang lo leh Presbyterian Kohhran zia hre fumfe lo rawngbawltu tam tak an awm nuk tawh a rinawm a. Harhna chang chawia, lamtuala lam leh rik luih luih thupui bera kan neih a, thlarau ta ber emaw kan tih thin avangin kan Pathian biak inkhawmah pawh Pathian duhzawng aiin keimahni duh zawng a lian mah mah thin zawk em aw tih chang tam tak a awm thin.
 
4. KTP Hruaituten Kan Hriat Reng Tur Chu:
KTP member te hi nakin lawka Kohhran Kut Ke la ni mai turte kan nih avangin Presbyterian Kohhran zia humhim kawngah mawhphurhna lian tak kan nei a. Tin, chumai bakah Kohhran hnathawh ti puitlingtu tak tak te kan nih avangin kan chevel hian Kohhran dinhmun thui takin a hril a. Chuvangin, Pathian rinchhana rilru fim tak kan put hi a ngai em em a ni.

Kum 2008-a Mission Vengthlanga Pawl 12 ka zir laia Rev. Lianhmingthanga thusawi ka la hriat reng pakhat chu, “Kohhran inkhawma kan hla sak thinte hi chhut ila Rs 5/- man pawh a tling lo hial mai awm mang e’ tiin Pulpit ah a auchhuahpui a. Ngaihtuahna a ti thui hle. Kohran tam tak chuan keimahni duhzawng leh tuipui zawng ang ringawtin Pathian biak inkhawm hi kan kalpui thin em aw a tih theih a. Kan biak Pathian ber hian hmun laili a chang tlem tial tial hian a hriat thin. 

Chutianga dinhmun awm kan nih avang chuan KTP member te hian tih tur tam tak kan nei a. Kohhran fachuam tak tak leh khawvel hmasawnnain a ken tel, thiamna leh finna kawngah pawh thuk zawk leh fingvar zawk tura ngaih kan nih avangin kan Kohhran Pathian biak kalpui dan te hi ngun taka kan chik a, Presbyterian Kohhran zia a ni ang em? Lamtuala hnehna puanga au vak vak te, kan zai tui deuh avanga hla nawn vak vak te, zai laia kut lo ben vak vak te hi Kohhran inkhawm ti zahawmlo tu a ni thei mai ang em, chutiang fellowship zia chu Worship Service a seng luh chi a ni ang em tihte hi ngun taka kan chik a ngai takzet a ni. 

Kohhran miten kan mamawh ber ni-a lang chu kan hruaitu hmasa kaltate- Rev. Thansiama, Rev. Saiaithanga, Rev. Thangpuiliana etc. te anga Kohhran humhalh duh mi, thlarau ze nawiin Kohhran a rawn nek chang a huai taka Kohhran chhan nana ke pen ngam, mi tak leh fir te an ni a. Heng kan hruaitu hmasate hniakhnung hi, keini KTP member te hian kan entawna, kan zui ngam a ngai tak meuh meuh tawh a ni. Chuti ni lova, a phawvuaka KTP ah kan inhman ve ringawt a, Pathian duhdan aia keimah hlimna leh lawmna mai tuipui a, member hip loh hlaua thlai inkhawmte dahlau taka kalpui a, nakina Kohhrana sengluh kan pawisa lo a nih zawngin kan Kohhran hian a zia dik tak kan bosal thuai ang a. Kan Pathian biak inkhawm te hi Vanapa Hall inkhawm ang lekah kan la chhuah mai ang tih hi a hlauhawm em em a ni. Chutiang hun a thlen vaih chuan Presbyterian Kohhran hian zia a lawi pawh a nei tawh lovang.

Thalaite hi Kohhran nghahfak tak meuh meuh kan ni a. Chuvangin, rilru nei tak leh fim taka ngaihtuah chungin Kohhran humhimnan leh kawng dik a zawh a, keimahni hlimna leh lawmna mai nilova Pathin duhdan anga kan kal a, Pathianin hmun laili ber a luah a, Lal Isuan hmun sang ber a chan zel theih nan Pathian rawn chungin theihtawp i chhuah zel ang u. Krista leh Kohhran – Kan Damchhan Ber Ni Se.

Post a Comment

He post chungchanga i ngaihdan lo sawi ve rawh:

Previous Post Next Post