"Guest of Eden" lehkhabu tlangzarhnaah ka kal ve a.

- K Remruatfela

Mi te anga thuziah thiam ni ve lo mah ila naupan tet ata lehkha chhiar leh lehkha ziah hi ka inawm tlei ve na ber a ni a. Lehkhabu ziaktu ngei ten min sâwm a nih phawt chuan tawiawm zel ka tum ang ti-a ka lo intiam thin angin he lehkhabu ziaktu ngeiin sâwmna duhawm tak min pêk ve tâkah chuan ka han tawiawm ve a, nihlawh ka inti em em a ni. Mak tak maiin hun hman chhûng zawng khan suangtuahna lipuiah ka chêng a, a châng leh vannei leh vanduai ni-a inhriatnain min kârcheh a. Chûng ka suangtuahna luangliam chu thiam ang chhun chhuna rawn pho chhuah ve ka tum a ni.


He kan lehkhabu chhuak thar "Guest of Eden" tih Miss Rodingpuii (rdp) ziah hi tlângzarh hlim hlawl a la nih avangin uluk takin ka la bihchiang hman lova. Amaherawhchu, thim hlima a bu chhung thu ka han bih thuak ringawt pawhin suangtuahna lipuiah min pilpui riai riai thei hial hman zu nia! A ziaktu hi ka chhang chhang leh rual vel a ni a. A dam chhunga a hun hlu berte zinga mi ni fo tawh tur hriatpui tura nu leh pa a la nei bik hi a vannei ka ti tak zet a ni. He lehkhabu tlângzarh a nih laia ka rilru min mawlhtu ber chu engdang ni lovin, amah anga nu leh pa la neih ve hi a van châkawm tehlul em tih hi a ni.

Pathian khawngaihna zarah lehkhabu hi 17 ka lo tlângzarh ve tawh a. Ka lehkhabu tam zawk hi chu vairama lehkha ka zir laia ka ziah leh tlângzarh nghalte an ni hlawm a. A hnuhnung pariat erawh Mizoram ka lo chuan chhuah tawh hnua ka ziahte an ni thung. Ka pa hi mahni tâwka thu leh hlaa tui ve tak, a dam laia lehkhabu 5 lai lo tichhuak ve tawh a ni a. A nghahhleh ber thin chu Mizoram chhung ngeia ka lehkhabu tlângzarh inkhâwma min rawn telpui ve theih thin tawh hi a ni. 

Nimahsela, vanduaithlak takin Mizoram ka lo chuan chhuah hnu rei lo te-ah vân kohna chhangin chatuan ram min pan san ta mai si a. Ka pa nena kan lo suangtuah thin zawng zawngte kha vawilehkhatah boruakah a thamral zo ta vek mai. Aizawl lamah mahnia in luah kan ni a, ka nu leh unau zawng zawngte hi Serchhipa awm vek an ni thung a. Min phurpui ber tu tur, ka pa ber a awm tawh tâk si lovah khualkhuaa awm chhungte phut chhuah kher hi buaithlakna chen pawh tam tak a awm a. Chuvang chuan, chhungte buaipuitu leh tawiawmtu awm hauh lovin mal leh khawhar takin lehkhabu kan tlangzarh ve rak rak thin kha a ni a. Min tawiawm thintu ka thian tha tak tak hi awm lo phei se la chuan ka mualpho nasa ngawt thin ang. Heng zawng zawng ka ngaihtuah hian ka thiannu hi a vannei ka ti bik tak zet a ni.

Lehkhabu tlangzârh inkhâwmnaah hian ka kal  tam ve viau tawh a. Amaherawhchu, tun tum tluka mipuiin an hlut hi a tam lo viau âwm e. Hei hian thangtharte thinlungah he lehkhabu ziaktu hian chi a kui tiah hnem zia thui takin a tarlang a ni. Miss rdp thu leh hla hi a instagram page velah ka chhiar fo thin a. Hetiang taka thûka hringnun lairil a khawrh chhuak thei bik thin hi tluk lo rim a nam hle mai. A cover design mawlh mai hian rilru a hneh. Literature fir tha awmna reng rengah chuan thumal chhun han khat tê pawh hian awmze thûk tak a nei thin a. He lehkhabu kâwma thuchei (paint) mawi tak pawh hian keini ang duang chhut ve phâk rual loh thu ril thûk ropui tak a inphumru ngei dâwn a ni tih chu hai rual a ni lo!

Thu ziak thin mi te hi mi khawngaihthlak berte kan lo ni e ka ti fo thin a. A chhan chu thu tisaa chan tir tur hian kan tawrh phawt a ngaih thin vang a ni. Lehkhabu pakhat chauh pawh khâwr pum tur hian tha leh zung sên ngai a tam em em a. Kan kianga awm ve tlattu an awm loh phei hi chuan beidawn rum rum châng a tam thin hle! Sap thufingah chuan "Behind every succesful men lies a women" tih a awm a. Mi hlawhtling tam tak phêna a kila lung tangkai berte chu an kawppuite hi an ni fo thin reng a ni. A ni taka, mihringte hian kan thil tihnaah hian fuih phurtu leh tuipui theitu hi kan mamawh em em vek a. Hruihrual pahnih kha hruihrual pakhata suih fin a han nih chiah hian chakna tui hnà, tulh tharin a awm thin a ni.

He lehkhabu pawh hi a chhung thu han chhiar hian suangtuahna lipui atanga rawn irhchhuak a ni tih a chiang em em a. A bu chhûng thu tâwi ril tak inphûm ru phêna fiah taka lo lang chu, tu dang ni lovin a nu leh pa te hi an ni ka ti lo thei lo! "Guest of Eden" tih lehkhabu hi phek 201-a chhah niin Rs.300/- man chauh a ni a. Hringnun zawhna kan chhan thiam ngei theihna turin lo chiar ve vek thei ula ka ti hle mai.

Post a Comment

He post chungchanga i ngaihdan lo sawi ve rawh:

Previous Post Next Post