Aizawl | June 27, 2022: NIT Mizoram Convocation vawi 5-na chu vawiin tlai dar 4:00 khan Aijal Club-ah hman a ni a, Chief minister Zoramthanga'n khuallian niin a hmanpui.
He hunah hian Kum 2020-2021 academic session a degree pass chhuak kum 2016-2017 leh 2017-2018 a Under Graduate (UG), 2019-2020 a Post Graduate (PG) te leh Doctor of Philosophy (P.hD ) te hnenah degree hlan a ni.
Prof. S. Sundar, Chairman BoG leh Director, NIT Mizoram chuan convocation hi kaihruaiin, report a pe a, he zirna inpuiin hlawhtlinna a neihte a tarlang bawk a ni. Chief Minister, Pu Zoramthanga chuan khuallian niin he hun hi a hmanpui a, thu a sawi bawk.
Zoramthanga chuan, Zirlai kalkhawmte chu ram tana an thiamna te hmang turin a chah a, hlawhtlinna hi a tawpna a nih loh thu a sawi bawk.
Chief Minister chuan Convocation Address-ah graduate tharte chu a lawmpui thu sawiin, an hlawhtlinna atana an nu leh pate leh zirtirtute kaihhruaina leh inpekna chungah lawmthu a sawi bawk a. Graduate-te chu an kal zelna tur eng pawh thlang se, India ram economy a than chhoh lai taka graduate an nih avangin remchanna tam tak an tan a inchhawp tih hre chungin, an thiamna te chu ram leh mipui tan tangkaia hmang zel turin a chah a. An kal zelna turah theihtawp an chhuah chuan hlawhtlinna an hmuh zel theih tur thu a sawi. NIT campus nghet tha tak an neih thuai a duhsak pui thu sawi bawkin, an technology thiamna hmang tangkaia environment nen inhne rem tak "Green NIT" campus, state dang tan pawh a entawntlak an siam ngei a beisei thu a sawi bawk.
Mizoram Youth Commission Chairman Dr. Vanlaltanpuia pawh he hun hi a telpui a. Prof. S. Sundar, Chairman Board of Governors leh Director, NIT Mizoram chuan convocation hi kaihruaiin, report a pe a. He zirna inpuiin hlawhtlinna a neihte a tarlang a. Dr. Lalthanchami Sailo, Registrar chuan lawmthu sawiin convocation hi a khar a ni.
Convocation ah hian Civil Engineering, Computer Science Engineering, Electronics and Communication Engineering, Mechanical Engineering leh Basic Science & Humanities department atangin Bachelor of Technolgy (B.Tech), Master of Technology (M.Tech) leh Doctor of Philosophy (Ph.D) zirlai hlawhtling 121 te hnenah degree hlanna neih a ni.
A hmunah hian zirlai 66 chu mahni ngei kalin degree hlan an ni a, tin, zirlai 55 te erawh chuan harsatna an neih avangin he convocation hi a hmunah an chhim thei lo thung.
Department tina zirlai titha ber theuh mi 7 hnenah Gold Medal hlan an ni bawk.
He Convocation hi online leh offline hmanga neih a ni a, LIVE streaming hmanga pek chhuah a ni bawk. Convocation hmanna video record pawh NIT Mizoram website www.nitmz.ac.in ah en theih tura dah a ni.
Post a Comment
He post chungchanga i ngaihdan lo sawi ve rawh: