Naga Students' Union of Mizoram-in Central YMA-ah Raltlan ṭanpuina hlan

Aizawl | June 1, 2022: Vawiin June Ni 1, 2022 (Nilaini) tlai dar 5 khan Naga student Union of Mizoram hruaitute chuan Central YMA kaltlanga Myanmar Raltlante tanpuina turin  sumfai ₹13, 890/- leh thawmhnaw bag 4 lai mai, Central YMA hruaitute hnenah an hlan.

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]




He thilpek hi Central YMA aiawhin Asst. Secretary Prof. Malsawmliana leh Treasurer Pu Fabian Lalfakawma ten an lo dawngsawng a. Central YMA hruaitute hian, Mizoram chhunga awm Naga Zirlai tena Myanmar ram tualchhung buaina avanga an sahim nana Mizoram chhunga Raltlante tanpui duhna an nei chu lawmawm an tih thu leh an thilpek chu Raltlante hnenah a rang thei ang bera an lo hlan vat tur thu an lo hrilh.

Thlamuang taka awm tur leh Mizorama an zirlaite tha taka zir zel turin duhsakna an lo hlan nghal bawk a ni. 

Mizorama Naga zirlai hruaitute chuan tun dinhmunah Aizawlah hian Naga zirlai 250 vêl an awm tih an sawi a. Mizoram chu nuam an tih thu leh kawng engkimah harsatna an tawh ngai loh thute, YMA dinchhan leh an hnathawhte tha an tih thute, an Ram leh Hnam tana YMA ang hi neih ve an duh thun thu Central YMA hruaitute hnenah hian an sawi a ni. Myanmar Raltlante an thinlungah an cham reng thu leh an theih ang tawka Central YMA kaltlang ngei tanpui ve an duh avanga hma la an nih thu an sawi bawk a ni.

Central YMA hruaitute chuan Raltlan puala an sum neih sâ leh hemi puala an sum dawn tharte nen hian remchang hmasa berah Raltlante tanpuina hi sem chhuah leh vat an tum thu an tarlang nghal bawk a ni.


Naga Students' Union of Mizoram hian June 4 hian an kum 25 an lawm dawn a ni.

Post a Comment

He post chungchanga i ngaihdan lo sawi ve rawh:

Previous Post Next Post