MAMIT-AH BIAKHMUHTHEIHNA HMANGIN DISHA MEETING NEI

Mamit | June 21, 2022: Nimin khan Pu C. Lalrosanga, Hon'ble MP(LS) Chairman hovin Mamit District Development Coordination & Monitoring Committee (DISHA) meeting biakhmuhtheihna hmanga neih a ni a. Pu Lalrintluanga, Dy. Govt. Chief Whip, Pu Lalnunhlua, District Bawrhsap, Member Secretary leh DISHA member-te'n DC Conference Hall, Mamit atangin Meeting hi an tel bakah Er. H. Lalzirliana, Vice Chairman, Roads & Infrastructure Development Board chuan video conferencing hmangin meeting hi a telpui ve bawk.

 

DISHA Meeting-ah hian Mamit District chhunga Department hrang hrang hnuaia Central Scheme 18 kaltlanga hmalakna MGNREGS, PMAY(Gramin), PMGSY( Housing for all-Urban), PMKSY, SBM (Gramin) NRDWP, NRLM, NHM, Samagra Shiksha, ICDS, NSAP, MDM, Infra.like Telecom, Highway etc. IPDS, PMEGP, PMGSY, PMUY, Aspirational District hnuaia hmalakna hrang hrang leh hmachhawpte tarlana sawiho zui nghal a ni.

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]

MGNREGS hnuaiah April - June thla chhungin Ni 28 inhlawhna siam tawh a nih thu tarlan a ni a. Tun dinhmunah Mamit District-ah Job Card 22085 a awm mek a ni. Jal Jeevan Mission (JJM) hnuaiah khaw 73-a chhungkaw 9825 te chu tui connection pek an ni a. School 291 leh Anganwadi 287-ah tui connection hi pek an ni bawk. Samagra Shiksha, Mamit District hnuaiah zirlai naupangte'n athlawnin mi 11412 te'n Uniform an dawng a, naupang 11994 hnenah Textbook athlawna pek an ni.

 

Kumin April atanga May thla inkarah khan Mamit District-ah nausen thi 6 awmin Infant Mortality Rate chu 28.2% anih thu tarlan a ni a. Kumin January - May-ah TB case hmuhchhuah 21 a nih thu tarlan niin TB leh HIV vei kawp mi 2 hmuhchhuah an ni. Kumin chhungin Malaria vanga thi an awm loh thu tarlan a ni bawk.

Meeting-ah hian BSNL Mamit hmalaknain khaw 20-ah 4G hman anih theih nan hmalak mek a nih thu tarlan a ni bawk.

Nimin thutkhawmah hian Mamit khawpui chhunga NGO aiawh meeting-a telte atangin Mamit District atana zirtirtu lak, kan District chhunga awm lote chu kan District-a an rawn let theih nana hmalak nise tih a ni a. Doctor Specialist kan neih kim lohte pawh neih belh dan ngaihtuah nise tih anih bakah Tuipuibari khua-a Higher Secondary School din dan tur ngaihtuah nise tih a ni bawk.

Meeting chuan kan District-ah Power & Electricity leh kawngpui sial mekah harsatna hrang hrang abik takin Forest Department atanga forest clearance a ngaih avanga kalpui chak a ni thei lo chu pawi a ti a. Special Category State kan nih angin Forest lamah pawh inngaihnathiamna awm thei se an duh thu an tarlang a. Marpara Rural Bank pawh DISHA thutkhawm lehah chuan PMEGP Scheme hnuaia telh ni ve tawh se tih a ni bawk.

Nimin DISHA biakhmuhtheihna meeting-ah hian DISHA Member-te bakah NGO's hrang hrang aiawhte an tel a ni.

 

- DIPR