Ticker

10/recent/ticker-posts

LRM Hospital-a Nurse in dam lo inenkawl senso peksak!

Aizawl | June 7, 2022: Tunhnai khan LRM hospitala thawktu Nurse pakhat a hming tarlan duh lo chuan dam lo an enkawl inenkawlna a lo peksak vek thu a darh a, a lawmawm em a, a darh ang angin kan han dah a ni.
He thu hi a tak ngei a nih chu Ngopa lama khawtlang hruaitute hnen aṭanga kan dawn hnuah kan dah a ni. 

Tv Lalhlimpuia,(kum 17) Pu Israel Lalhmudika fapa Ngopa chu pumna avangin ni 27/5/2022 khan Ngopa aṭangin Sumo Service-ah Aizawl panpui a ni.




Kawng lakah a na a zual avangin Ngopa Doctor in vawihnih nachhawknain a jection a. Amah a chauh tawh em avangin Damdawi In hnai ber pan turin Doctor chuan a tih avangin LRM Hospital-ah an lut a, a zan a zanin an zai nghal a. A ril hmun hnihah a lo pawp a, ṭha taka zai a ni.

Anmahni hi chhungkaw harsa ve tak an nih avangin damdawi in awm manah an buai hle a.

Damdawi in awm man bill pek a lo ngaia an khawsak a harsat avangin pek tur an neih tak loh avangin anmahni In luahlai chu hralh mai an tum ta a ni.

Ni 4./6/2022 khan LRM aṭang chuan an chhuak thei an ni ta a, Damdawi In an awm chhung hian Ngopa lamah an In hralh lova, anmahni In ngeia an hawn leh theih nan tiin Samaritan Ngopa inti te chuan anmahni ṭanpui nan tiin Ngopa khawchhungah bawm an dawh sak a. Bawma thlak theilo tan GPay hmanga a pek theihna an tarlang bawk a, ni 4/6/2020 a chhuak thei chu pawisa an neihloh avangin Aizawl lamah ₹ 20000 vel tala lo la chhuak thei an han zawn laiin Lengteng Bialtu MLA Pu L Thangmawia leh Ngopa Welfare Aizawl hruaituten lo hriain pawisa zawng chawpin LRM Hospital aṭang chuan an la chhuak ta a ni.

An damdawi In awm man hi a vaiin ₹ 122000 vel a ni a.₹ 50000 advance a pein lakchhuah a ni ta.

Hemi zanah hian LRM a thawk Nurse pakhat chuan an pawisa la bat ₹ 72200 vel lai chu ngawi rengin a lo pek sak vek mai a. Tv Lalhlimpuia nu leh pa leh pi te leh Ngopa Welfare Aizawl te kan lawm em em a, kan lawmzia sawi sen a ni lo. Tunge a petu LRM Hospital Nurse hi an hre lova, tunge a nih a insawi duh bawk silo.

Hetianga Pathian mi, miretheite khawngaih tu LRM Hospital Nurse hi a fakawmin tunlai ang pawisa hatsatna kara hetianga pawisa tam tak mai mi harsa leh ṭanpui ngai tana a pe hi a dawngtute chhungkua leh Ngopa Welfare Aizawl te chuan kan lawm em em a, lawmthu kan sawi mawlh mawlh a ni.

A let tam takin Pathianin malsawm rawh se.

- Ngopa Welfare, Aizawl
Post i hmuh dan

Post a Comment

1 Comments

He post chungchanga i ngaihdan lo sawi ve rawh: