LAWM TURIN MIDANG PAWMPUINA LAK KHER A NGAI LO

- Rick Warren

- June 7, 2022



“Engnge a pawina? A derin emaw, a takin emaw Krista Thu hrilh a ni ta reng reng a, chu mi chuan mi ti lawm tho ve. A ni, ka lawm zel ang.” Philippi 1:18

I hringnunah midangin i ngaihtuahna an thunun lo a nih chuan i lawm thei ang.

Philippi 1:15-17 ah Paulan tanina a tan chhunga mi chi hrang hrang a hmachhawnte a sawi a. Ṭhenkhatte chu rilru ṭha tak pu a rawngbawlnaa amah tichaktute pawh an awm a ni. Amaherawhchu ṭhenkhatte chuan an sawisela, an itsika, elrelna nen a rawngbawlnaah an bei a ni.

“Ṭhenkhat chuan itsikna leh elrelna avangin Krista Thu chu an hril ṭhin a, a ṭhen erawh chuan rilru ṭha tak puin an hril thung a; chungte chuan Chanchin Ṭha ṭan turin Pathianin hna min pe a ni tih hriain hmangaihna avanga hril an ni. Mi ṭhenkhat zawngin an ti tak tak lo, elrelna avang chauhin kawl ka bun chungchangah hian buaina mi belhchhahsak tura ti an ni.” Philippi 1:15-17 

Nangmah sawiselna leh nangmah dodal anga an lanna aia rang i hlimna laksak thei thil dang a tam lo. Engnge a chhan?A chhan chu tute pawh hian hmangaih nih chu kan duh. Tute pawh hian min pawm se kan duh. Tute pawh hian min ngaina se kan ti. 

Paula rawngbawlna chawk buaitu awm mah se, “Engnge a pawina? A derin emaw, a takin emaw Krista Thu hrilh a ni ta reng reng a, chu mi chuan mi ti lawm tho ve. A ni, ka lawm zel ang.” Philippi 1:18

Lawm turin midang pawmpuina i lak kher a ngai lo.

Lawm tura thutlukna i siam chuan i lawm mai ang! I lakah midang an lawm lo a nih chuan, chu chu an duhthlan a ni tawh. Tunah hian mi i ti lawm lo a nih chuan, i la ti lawm lo zel dawn pawh a ni thei – mi zawng zawng tih lawm i tum phei chuan i tan a hrehawm dawn lutuk.

Paulan chang 29 leh 30 ah khan, engti kawng zawng pawhin a lawm theih thu a sawi chhunzawma , “Krista avanga amah in rin chauh ni lovin, amah avanga in tuar pawh phal a ni si a; indona keimaha in hmuh ṭhin, tunah pawh keimahah a awm tih in hriat, chu mi ngei chu in neih ve tak hi” 

Paula chuan thil dik tih avanga hrehawm tawrh chu lawm tur zawk a ni a ti a, a chhan chu Isua kan anna a ni a ti bawk.

Mi in an sawi vang emaw mai maiin i lawmna kha hliahkhuh che suh se. I lawmna chu Pathian aṭanga chhuak a ni si a!

Ngaihtuah zui atan

* Tu pawmpuina nge lak i lo tum ṭhin le? Chu pawmpuina chu eng vanga mamawh nge nia i inhriat? 

* Eng vangin nge Pathian pawmpuina chu midang pawmpuina aiin a zalen bik?

* Beih leh sawisel tawk nia i inhriat khan Pathian chu nangmahah leh nangmah kaltlangin engtin nge hna a thawh i rin?

*[Lettu: Sangpuia]*

Post a Comment

He post chungchanga i ngaihdan lo sawi ve rawh:

Previous Post Next Post