Hlimna nun kawng
KAWNG ENGKIMAH LAWM ZEL RAWH
— Rick Warren
— 22 June, 2022
“Engkimah lawmthu hril fo rawh u; chu chu nangmahni lam thuah Krista Isuaah chuan Pathian duhzawng a ni si a.” 1 Thessalonika 5:18
Khawvela hnam hrang hrangte hian hun bik ruatin lawmthu sawina hun an lo hmang ṭhin a. Mahse Pathian chuan nitina lawmna nun nei turin a duh che a ni. He nun hi nei chhunzawm zel turin a duh che a, chu nun chu ringtu nunah lang chhuak se a duh bawk a ni. Pathian hmangaihna i hriat ril poh leh, i hlim zual ting mai dawn a ni.
Lawm zel nun neih chu eng nge awmzia ni ang le?
Bible-in 1 Thessalonika 5:18 ah a sawi a, “Engkimah lawmthu hril fo rawh u; chu chu nangmahni lam thuah Krista Isuaah chuan Pathian duhzawng a ni si a.” Engkimah lawmthu sawi ang che, a chhan chu i tana Pathian duhzawng a ni si a. Chu chu lawm zelna nun neih dan a ni.
Hun harsaah pawh engtin nge lawmthu i sawi theih ang? Pathianin engkim a thunun avangin lawmthu i sawi thei ang. Thil ṭhalo aṭang pawhin thil ṭha a thlentir thei a. Thil i tihsual nasat ber pawh a rawn her remtir thei a ni. Eng pawh lo thleng se, Pathianin a hmangaihna che hi a tawp lo vang.
Hun te chu lo khirh deuh chang awm mahse, kawng engkimah lawmthu sawina tur a za tel i nei zel ang.
Lawm zel nun – engkima lawmthu sawi hi Pathian lawmzawng a ni, a chhan chu inpawlna min neihtir avangin. Chu chu engnge awmzia? Lawmna chuan nang leh midang inkarah leh nang leh Pathian inkarah inlaichinna ṭha zawk a siam zel ṭhin a ni.
Mi dang nena inpawhna ṭha tak neih i duh chuan, chumi hnenah chuan lawmthu hrilh ang che. I kawppui nena inpawh lo riauva inhriatna i nei em? In inhmangaihna kha a dai deuhva inhriatna i neih chuan i thil tih ṭhin kha i tih tawh loh vang pawh a ni thei – ngaiah in in neih tawh avang pawh a ni thei. In inngaihzawn tirha i sawi kha sawi leh rawh: Lawmthu sawi rawh. Fuihna emaw lam hawi tlemte ziak rawh. Phone call emaw text emaw hmangin i lawmthu hrilh rawh.
Ṭhianho pawl neih i duh em? In inhmuhkhawmnaah kal ringawt suh. A hmain i ṭhiante chu be lawk la. I lawmthu te i lawmna chhan te hrilh rawh. In pawlho chu in nghet lehzual ang.
“Lawmthu sawi chungin a kawngkharah chuan lut ula, fak chungin a biak in hung chhung kawt laiah chuan lut rawh u. A hnenah lawmthu sawi ula, a hming chu fak rawh u. Lalpa chu a ṭha si a; a ngilneihna chu kumkhuain a awm ang a; a rinawmna chu chhuan zawng zawng thlengin a awm ang” Sam 100:4-5.
Ngaihtuah zui atan
* Tun dinhmunah eng thilah nge lawmthu sawi harsa i tih? Chu dinhmunah chuan thil pakhatah tal lawmthu sawina tur i nei em?
* I kawppui, i ṭhian emaw pawlho hnena lawmthu sawina tur mawlmang awmze nei si eng nge i neih?
* Lawmna nun neih zel i tumna kawngah hian, nangmahah leh in inlaichinnaah eng danglamna nge i hmuh ang?
*I nunah Isua i thlang tawh em?*
Bible chuan Fapa Isua kaltlanga Pathian rinna chauhin vanram a luh theih a ti a. Nangma hlawhchhuah theih a ni lo tihna a nih chu. “Rinna avanga khawngaihnaa chhandam in ni; nangmahni thawhchhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e.” Ephesi :8-9.
I sualna te i puang duh a niha, i nunah Isua i thlang duh a nih chuan, heti hian ṭawngṭai ang che.
“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtikniah emaw chuan i chatuan in nuamah min lo pawm ve ngei dawn a ni.
“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i angchhunga min pawma min chhandam ve turin ka dil a che. Amen”
Hetianga i ṭawngṭai a nih chuan, Rick@PastorRick.com ah hian emai min lo thawn la. Isua nena zinkawng i zawh ṭanna atana pawimawh te a thlawnin ka lo thawn ang che.
[Lettu: Sangpuia]
Post a Comment
He post chungchanga i ngaihdan lo sawi ve rawh: