Commerce & Industries Development vice chairman-in Village Level Development Programme hawng

Aizawl | June 3, 2022: Planning & Programme Implementation Department, Government of Mizoram leh State Institute of Rural Development & Panchayati Raj te tangkawp hmalakna a thingtlang khua hmasawnna leh intodelhna tur ‘Village Level Development Programme’ chu Kolasib District a Pilot Project atan a thlan Lungdaiah, Tuirial bialtu MLA Pu K.Laldawngliana, Vice Chairman Commerce & Industries Development chuan nimin khan a hawng.

Pu Laldawngliana chuan Lungdai khua chu Pilot Project atan a hman a nih ang ngeiin entawntlaka thawkturin a chah a, he Project hi a vilpui turthu a sawi a. VLDP bultanna turin a thawhkhat nan Cheng Nuai 5 a hlan nghal bawk a ni.
SIRD & PR Director Pu Lalhmunsanga Hnamte chuan VLDP kalpuina tur hian Pilot project-ah Mizoram chhung District 6-a khua pakhat theuh thlanchhuah an ni a ti a, chung zingah chuan Kolasib District-ah Lungdai chu thlan niin, khaw mil zela hmasawnna an kalpui tur zingah Lungdai khua ah chuan Tui chhekkhawl bakah Vawkvulhna hmun tihchangtlunte an kalpui dawn a ni, a ti.
PPI Dept Research Officer Pu H Lalengzauva chuan VLDP kalpuidan sawifiahin Sialam khua, Aizawl District-ah handloom; Sekhum khua, Lunglei District-ah khuaikhawi leh balhla chin; Chawngtlai khua, Khawzawl District- ah handloom; Ailawng khua, Mamit District-ah tourism and livelihood; Lengkhua, Serchhip-ah irrigation canal hmalaknate kalpui a ni dawn a ti a; heng EPA kalpuina tura tan hian cheng Nuai 10 theuh pek an ni dawn a ti.