Tuna Budgeta hlawh tur dah hian daih ngei tura chhuta dah a ni - Finance Deptt

Aizawl, the 4th May 2022: Finance Department, Government of Mizoram chuan Budget a hlawh dah chungchangah thuchhuah a siam.

“Kum 2022 atanga 2023 inkar chhunga hman tur Budget-ah Sawrkar hnathawkte hlawh a kum hmasa aia dah tlem thuah mi thenkhatten thil an hriat kim loh deuh hlek a awm avangin hetiang hian sawifiahna siam a ni e.

Budget buatsaih dawn hian Department tinah an hlawh mamawh zat tur hisap chu Finance Department-ah pe tura hrilh vek an ni a. Hetah hian a tlangpuiin Department ten an ven thawn leh thahnem ngaihna avangin an pe tam hle thin a. A tlangpuiin hlawh tura Budgeta dah hi hman sen a ni ngai lo a. Kumin kum kal ta 2021-2022 kum chhunga hlawh tur Budget a dah pawh kha tuna chhut chhuah tawh chinah chuan cheng vaibelchhe 336 zet hman zawh lohin a awm a. Hei hi chhut chhuah kim vek hunah phei chuan cheng vaibelchhe 400 chuang zet tling tura ngaih a ni. Hetiang hi a nih avangin Budget buatsaihtu Finance Department chuan kum 2022-2023 Budget-ah chuan chutiang chu a nih tawh loh nan a tak taka mamawh zat tur hisapin Budget-ah hian hlawh tur a dah ta a ni. Tuna Budgeta hlawh tur dah hian daih ngei tura chhuta dah a ni e. Budget siam laia la awm lo mamawh thar lo thleng palh a awm a nih pawhin chungte pawh chu a mamawh ang zelin pek tura inruahman zel a ni ang”.

- DIPR