Ticker

10/recent/ticker-posts

Azadi Ka Amrit Mahotsav "Freedom Trek" nei

Aizawl | May 4, 2022: India-in zalenna a hmuh kum 75-na lawmna kal zelah Mizoram Tourism Department buatsaihin nimin khan Freedom Trek neih a ni a, Chief Secretary Dr Renu Sharma-in Khuangchera Hall, Ailawng kawt atangin Freedom Trek a telte hi a vailiam a ni.




Freedom Trek puala inkhawm tawite Khuangchera Hall kawta buatsaihah Chief Secretary Dr Renu Sharma chuan thalai rual Freedom Trek a tel tuma rawn kalkhawmte chu lawmthu a hrilh a, Tourism Department in ruahmanna tha tak an siam chu lawmawm a tih thu a sawi bawk. 

Dr Renu Sharma chuan Freedom Trek chu India ram in zalenna a hmuh theihna tura mahni inphat leh nunna chan huama pen chhuak pasalthate hriatrengna leh chawimawina a nih bakah faina kawnga inzirtirna pawimawh tak a ni, a ti a. Kan thlahtute kha ramngaw leh nungchate nen in zah tawn takin an cheng ho thin a, an thlahte hian kha kha kan ti dal telh telh mai a, a nghawng pawh nasa takin kan tuar mek reng a, chuvangin keini tuna chhuan awm mekte hian Pathianin thilsiamte inrem leh inngeih taka cheng za tura min tih kha kan chawi nun a ngai a, thang leh thar, chhuan lo la awm turte tana chenna tlak khawvel lan hnutchhiah a ngai a ni, a ti. 


Dr Renu Sharma chuan Mizorama Khualzinte hip kawnga tan kan lakna kawngah faina leh thianghlimna, sik leh sa ti chereu lo zawnga kal hi kan zawrh a ngai a ni, a ti a. Faina beihpui thlak "Swachh Bharat Campaign - cum - Responsible Tourism" hi thupuia kan neih a tul a ni, a ti. 

Freedom Trek ah hian Aizawl khawpuia College leh Higher Secondary School zirlaite bakah thalai rual 300 chuang an tel a, Trekking a tel zinga upa ber hi Pu Lalsanga, kum 92 mi, Bethlehem Veng, Aizawl a ni. Anni bakah hian Manipur atangin Tourism Department official an rawn tel bawk a, Sports & Youth Services Department atangin trekking expert thahnem takin telpuiin a tul angin an vil a, medical team in trekking a tel te hi uluk takin an vil bawk a ni. 

Trekking hi Khuangchera Hall, Ailawng atanga tan niin Reiek tlang chhip an cuan chhuah hnuah Reiek Tourist Resort an pan leh a, a vaia a thui zawng hi kilometre 5.5 a ni a, kawng lakah hian hahchawlhna hmun 5 ah siam a ni. 

Respond Tourism (faina kawnga inzirtirna) atan trekking a tel zawng zawngte hnenah hian paper bag pek an ni a, trekking an neih pah hian kalkawnga bawlhhlawh an hmuhte an thian fai nghal a ni. 

Trekkinga tel te hi mahni lirtheia kal an awm bakah, lirthei nei lote tan Tourism chuan bus a ruahman a, Vanapa Hall atang bus 5 in an kal a ni. 

Trekking flag off inkhawm Khuangchera Hall, Alawnga neih hi Tourism Secretary Pi K. Lalrinzuali'n a kaihruai a ni. 

Azadi Ka Amrit Mahotsav pual hian Reiek Tourist resort-ah Adventure Festival neih a ni bawk a, he festival-ah hian adventure sports chi hrang hrang mipuite tan a thlawnin chhawpchhuah a ni.


More Photo HERE
Post i hmuh dan

Post a Comment

0 Comments