N. MUALCHENG KHAWTLANGIN PU K. VANLALVENA, MP, RAJYA SABHA TLIN LAWMNA LEH CHAWIMAWINA NEI

Serchhip | May 27, 2022: Vawiin khan N. Mualcheng khawtlang mipuite chuan an sum thawhkhawm hmangin an khaw chhuak Pu K. Vanlalvena, MP, Rajya Sabha tlin lawmna N. Mualcheng Community Hall ah an buatsaih a, tlaiah an khaw Mualah khawtlang huap ruai an theh.


N. Mualcheng khaw laili laia K. Vanlalvena chawimawina Lungphun hawn a nih hnuah Community Hall ah a lawmna inkhawm buatsaih zui a ni a. He hunah hian Pu K. Vanlalvena chuan, khawtlangin sum leh pai thawhkhawma MP a tlin lawmna an buatsaih sak chu a lawm tak zet tih sawiin, kum 40 kaltaah khan N. Mualcheng Community Hall ah hian pawl nga kan zir thin a, vawiinah a hmun ngaiah ngei MP kan tlin lawmna khawtlangin min han buatsaih sak leh ta hi a ropui dangdai hle a ni, a ti. "Ka chunga thil lo thlengte hi Pathian remruat a nihzia a fiah em em a. Pathian rawngbawla vak chhuak thin, hun puma rawngbawl tuma inbuatsaih mek, politics lama kal tum ngai lem lo ka ni a, nimahsela Pathian hruaina ang zel zawkin thil a lo kala, he dinhmun ropui tak hi kan chungah a lo thleng ta a ni", tiin a politics zinkawng tlangpui a sawia, Chief Minister Pu Zoramthanga leh MP a tlin theih nana thawhpuitute zawng zawng chungah lawmthu a sawi a ni. MP a nihna zawna Mizoram tana hma a lakna tlangpuite pawh tarlangin, N. Mualcheng khaw tana NABARD sum hmanga Tuilak hna thawh tan thuai a nih a beisei thute, Model Village (SAGY) atana a thlan chhan leh Model Village kalphung tlangpuite a sawifiah bawk.


A lawmna inkhawm kaihruaitu Pu Lalbiakdika, VCP chuan, Pu K. Vanlalvena, Member of Rajya Sabha a tlin tirh phat atangin N. Mualcheng khawtlang mipuite chuan ropui taka lawm kan tum nghal a. Nimahsela hripui vangin hma kan la zui mai thei ta lova, hun tha kan thlir renga, vawiinah kan lawm thei ta ni, tiin MP a tlin an lawm sak har deuh thu a sawifiah a. He dinhmun ropui leh zahawm taka a tlin avang hian khaw mipui zawng zawngte hi kan hlim tak zeta, kan chhuang hle a ni. Chuvang chuan mipuiten phal takin sum kan thawhkhawma, ka thiam tawka ropuiin kan buatsaih a ni, a ti. Hun reilote chhunga Mualcheng khaw tuilakna tur Central lama a nawr chhuah sakte, Model Village atana a thlangte chu kumkhuaa theihnghilh tawh loh tur hmasawnna ropui tak a ni a, khawtlang a hmangaihna hi a ropui tak zet a ni, a ti.

A lawmna inkhawmah hian Pu K. Vanlalvena pa Pu K. Lalzikate, Serchhip district Officer sawm bikte, khawtlang hruaitute leh Mualcheng khaw chhuak hmun danga awm pawl aiawhte leh zaithiamten thusawina hun an hmanga, tlaiah Mualah khawtlang huapin ruai an theh a ni.

- DIPR

Post a Comment

He post chungchanga i ngaihdan lo sawi ve rawh:

Previous Post Next Post