JICA aiawh ten Biodiversity Conservation chungchangah Mizoram an rawn tlawh

Aizawl | May 27, 2022: Mizoram Sorkarin ‘Biodiversity Conservation and Forest Enrichment Project’ ruahmanna India Sorkar laipuia a thehluh umzuiin May ni 23, 2022 khan Japan International Corporation Agency (JICA) aiawh mithiamte chuan Mizoram an rawn tlawh a. He project-ah hian tunlai thiamna lam (technology) a tanpuina leh pawisa faia tanpuina Mizoramin a hmu thei dawn a ni. He Project hi JICA rolling plan-ah a tel mai bakah Steering Committee, Ministry of Finance pawhin a pawmpui tawh a ni.



JICA lam mithiam lo kal te hi ni 24 May, 2022 (thawhlehni) Chief Minister Pu Zoramthanga leh EF&CC Minister, Pu TJ. Lalnuntluanga te nen khun takin an inkawm a. May ni 25, 2022 (Nilaini) khan Forest Training School Campus an tlawh bakah Sakawrhmuituai tlangah an kal a, chawhnu lamah EF&CC Department Officers te nen he project kalpui tur chungchang hi an sawi ho bawk a ni.

Nimin ni 26 May, 2022 khan Kolasib Forest Division tlawhin, khawtlang mipui leh NGOs te nen an inkawm ho a, hetah hian project atanga hmasawnna an beisei leh hmuh theih turte an sawiho a ni.

He project hian ramngaw chhe tawh siam that te, tuihna humhalh a, enkawl te, mau hmanga eizawnna leh sumdawnna siam te, Eco-Tourism hmun siam leh Centre of Excellence din dan tur te ah te hmalak tum a ni. He project hian Department pathum EF&CC chu Nodal Department anih bakah Tourism Department leh Horticulture Department a huam bawk ang.

Mizoram chhunga mi mau lakchhuaha a hmuna hralhchhuah nghal tum a ni a, he project hi India ram chhunga a hmasa ber tur a ni ang a, he project hian a huam china mipuite tan hlawkna leh hmasawnna a thlen bakah Mizoram leilung ven leh hman tangkai kawngah nasa takin min pui thei tura ngaih a ni.

Vawiin May ni 27, 2022 hian EF&CC Minister, Pu TJ. Lalnuntluanga hovin a hmawr bawkna (wrap up meeting) an nei bawk a ni.

- DIPR

Post a Comment

He post chungchanga i ngaihdan lo sawi ve rawh:

Previous Post Next Post