MZP-in HSLC 2022 Top 10-a Mizo tlingte chawimawi; eng kawng pawh zawh ila, mi tangkai ber ni thei turin kan inzir a pawimawh - CM Zoramthanga

"Pukzing ram satthlaa Takam leh Tuikuk kuta pek tumna awm hi a tawp thlengin kan dodal zel dawn a ni"
- MZP President


Aizawl | May 25, 2022: Mizo Zirlai Pawl (MZP) General Headquarters chuan vawiin May ni 25, 2022 chawhma dar 11 khan Vanapa Hall-ah High School Leaving Certificate (HSLC) 2022 Top Ten-a Mizo tlingte chawimawina hun a buatsaih, He hun hi Vice president Pu Andrew F Lalramnghaka chuan a kaihruai a. Mizoram Chief Minister Pu Zoramthanga chuan khuallian niin a hmanpui.


Khuallian Chief Minister Pu Zoramthanga chuan, zirlai chawimawite chu a ngaihsan thu leh, an hlawhtlinna a lawmpui thu a sawi a. Hlawhtlinna sang zawk chang chhunzawm zel tura a duhsak tih a sawi.

Chief Minister chuan HSLC topper te chu a lawmpui thu a hrilh a. Tun tuma hlawhtlinna an chan chu duhtawk mai lova, zirna sang zawk an zir hunah theihtawp chhuah zui zel tura fuihin Chief Minister chuan vawiin topper chawimawina dawngtute leh zirlai dangte pawh theihtawp an chhuah chuan Mizoram mai nilo India ram pumah pawh a ber thleng phak an nih theih thu a sawi.
Chief Minister chuan eizawnna kawng an zawh naah tuina, thiamna leh theihna a inan vek theihloh thu sawiin, eng kawng pawh zawh ila, mi tangkai ber ni thei turin kan inzir a pawimawh a ni, a ti.


Chief Minister chuan state thenkhatte nen inkhaikhinin kan la naupangin, hnufual zawkna tam tak kan la nei a ni tiin hmasawnna tura hmabak tam tak a la awm thu a sawi a. Chu chu chonaah la in theihtawp chhuah a ram hmasawn nan hma lak tlan a ngaih thu a sawi a. Thangthar leh zirlaite pawh ram tan thahnemngai tak zir in, ram tan malsawmna ni khawp a an inzirchhuah a duhsak thu a sawi.

He huna thusawitu, MZP President Lalnunmawia Pautu chuan, "Ṭhalaite leh zirlaite hian ngaihsan tur dik leh ngaihhlut tur dik ngaihlu ila, social media a thu puarpawleng mai mai i buaipui lo ang u" a ti a. "MZP chuan sum tam tak senga hetiang hun kumtin a buatsaih chhan chu, an hlawhtlinna hi entawntlak a nihzia lantir nan leh an thiamna leh finna ram leh hnam tana hmang tura kan duhzia lantîr kan duh vang a ni a. Zirlaite karah inelna thianghlim thlense kan duh a ni" a ti.

MZP President chuan, Mizoram humhim tura MZP in theihtawp a chhuah reng tur thu sawiin, "Pukzing ram satthlaa Takam leh Tuikuk kuta pek tumna awm hi a tawp thlengin kan dodal zel dawn a ni" a ti bawk.


He chawimawina hunah hian HSLC 2022 Top Ten-a Mizo zirlai tling mi 14 te chawimawi an ni a. Kumin HSLC result-ah hian Dinsawmkimi d/o Lalhmachhuana, St Joseph HSS leh Lalramdina Ralte s/o Lalṭhakima, St. Pauls HSS te chu topper an ni.

MZP chuan chawimawina thuziak leh tangkafai bakah zirlaite tana ṭangkai tur lehkhabu hrang hrang HSLC Top-10 a Mizo tlingte a hlan.

Vawiina zirlai titha chawimawite hi lawmpuina thuziak citation leh sumfai bakah lehkhabu pathum pek an ni a. Topper pahnihte hi Rs. 10,000 pek niin, a dang zawngin Rs. 5,000 an dawng a ni.

Chawimawina dawngtute chu:
- Lalramdina Ralte, St. Paul's HSS (1st rank)
- Dinsawmkimi, St. Joseph HSS (1st rank)
- R. Lalremngheti, St. Paul's HSS (2nd rank)
- Lalkroshlui, Hermon School (4th rank)
- P.C. Lalremruati, Mount Carmel School (5th rank)
- C. Zomuanpuii, St. Joseph HSS (5th rank)
- Lalramzawnsangi, St. Joseph HSS (6th rank)
- K. Vansangpuii, St. Paul's HSS (6th rank)
- V Lalhmangaihzuali, St. Paul's HSS (6th rank)
- C. Zorammuana, St. Joseph HSS (8th rank)
- Saihlupuii, St. Paul's HSS (8th rank)
- Steffanie Rinchhani Sailo, St.Paul's HSS (8th rank)
- Lalremruata Ralte, St.Paul's HSS (9th rank)
- Vanlalmuansanga, Holy Cross School (10th rank)

Zirlai tithate chawimawina programme hi MZP Vice President Pu Andrew F. Lalramnghaka chuan kaihruaiin an President Pu Lalnunmawia Pautu atanga thusawi ngaihthlak niin General Secretary Pu Jacob Lalmuanpuia chuan report a pe bawk. Lawmthu sawiin treasurer Pu Sanghmingthanga chuan hun a khar a ni.

Post a Comment

0 Comments