Mizo Tlangval Indian Navy Officer thar - VL Malsawmzuala

Aizawl | May 29, 2022: Mizo tlangval chhuanawm, VL Malsawmzuala s/o V.L. Zaikima (Lengchhawn Press neitu), Khatla Bethel, Aizawl chuan Asia khawmual pui a Naval Academy lian ber, Indian Naval Academy, Ezhimala, Kerala atangin May 28, 2022 khan hlawhtling takin training a zo a, Indian Navy ah Commissioned Officer niin, Sub Lieutenant a ni ta.


Khatla tlangval VL Malsawmzuala hi Pu VL Zaikima leh Pi Hmangaihzuali (L) te fa 6 zinga a naupang ber a ni a. Naupan lai atang renga lehkha thiam thei, nungchang tha leh tumruh tak mai a ni a. Middle School naupang mai a la nih lai pawhin thenawm te insaknaah a thawh theih ang tawk, brick thiar leh thil dangah te a inhlawhfa ve ngat ngat thin a. Lehkha chhiar a peih hle a. Middle School a kal lai hian saptawng lehkhabu te pawh ngaihnawm ti takin a chhiar tawh thin a ni.


KG atanga Class VII thleng GCS, Mission Veng, Aizawlah a kal a. Class VIII atanga Class XII chu Rashtriya Indian Military College, Dehradunah kalin, Class XII a zawh hian UPSC buatsaih NDA & NA Examinationah tlingin, NDA ah hian kum 3 chhung graduation course training hautak tak paltlangin 29 May, 2021 khan hlawhtling takin a pass chhuak.

Infiam lam pawh a thei hle a. RIMC a a kal lai hian boxing ah medal engemaw zat a la a. NDA a a awm lai hian Divisional Cadet Captain a ni phak a, Best Helmsman in Yachting Award a dawng nghe nghe bawk a ni.

NDA atanga a chhuah hnu hian Indian Naval Academy ah a training chhunzawm a. Hetah hian term 1 (thla 6 chhung) an training phawt a, chumi hnuah Training Squadron ah Indo lawng, INS Sujata ah sea training thla 6 chhung an nei leh a. Sea training an neih chhung hian ram hrang hrang 5 an tlawh kual a. INA a awm lai hian Senior National Sailing Competition ah INA aiawhin a tel bawk a ni. Indian Navy officer ni tura training tha leh hautak em em mai chu hlawhtling taka paltlangin tunah hian Commissioned Officer a ni ta a ni. 

Ka hriat ve chinah chuan VL Malsawmzuala hi Mizo zinga NDA atanga Graduate chhuak Indian Navy a Commissioned Officer kan neih hmasak ber niin ka hria. Indian Navy ah hian Sub Lieutenant niin Vizag Naval Base lamah Indo Lawngah (onboard ship) a awm zui dawn a ni.

Mazuala hi kan chhuangin, kan lawmpui tak zet a ni!














Post a Comment

He post chungchanga i ngaihdan lo sawi ve rawh:

Previous Post Next Post