KAN AU THAWM A NGAITHLA

- Maruati Ralte

A hmasa in Laipuitlang Leimin (5/11) aṭanga Pathian min chhanchhuah dan tlem ka ziah hi khawngaiha min lo chhiarchhuah sak turin ka ngen a che u.


Kum 2013 May ni 11, zân chuan zan dang ang bawkin chhungkua in zanriah chaw te hlim takin kan kil ho a, zâna ruah a han sura Kawl a rawn phe a, Ṭek a rawn tlak nasat zia kha, ngaihṭhat lohna reng reng nei lovin kan awm a, zanriah eikham a mut a han hun meuh chuan zan dang a Sitting room chhuata mu ṭhin kha(Ka nawmsam loh vangin chhuata mut nuam ka ti tlat a) kan pa chuan zanin chu roomah mu ang ati a, ka peihlo chhuatah mu leh zawk ang ka ti a, kan pa chuan mutbu ahnawng duh emai ati tlat a ka mutsan dawn che ati a, min mutsan a, dar 11 vel ah k mu ve mai a, phone a hla te ka ngaithla a, ka phone a hla awm te a phone ah ka  thawn a, sap hla kha chu ka duhlo ania ati a ka hria alawm Pathian hla chiah ka dah ka ti a(zan danga ruahsur laia phone pawh khawih ngam ngailo kha khami zan kher kha eng ka tinge phone ka khawih tlat mai). Ka pum a rawn nuam lova, ka muhil thei silo, ka pum na lai ah chuan kan pa chuan a kut a rawn nghat a, ruah a rawn sur nasa in rial a rawn tla vak bawk nen, ka hlau lutuk chuan ka beng ka hup a, chu pawh chu duh khawp lovin kan pa kut chu ka beng hup nan ka hmang hial ani. Min muthilh san nghal daih sia, a rawn harh leh chuan inthiar va tum teh ati a, ruahsur laiin inthiar te chu tiin ka hnial a, a muhil leh nghal ta mai a.

Chutia mu ṭha thei lova ka awm chu kawl a rawn phe nasa em em mai a, ruah erawh chu a sûr tam lo. Rei fe hnuah chuan Phone ka khawih leh a, enge maw ti ti in zing dar 2 a ri ta der mai. Ka muhil theilo chu ka in letsek ah chuan kan pa chu a rawn harh leh a. Zanin hi i mizia ava mak ve ka ti a, zan dangah ka mut theih loh chang a min men pui reng ṭhin kha a ṭawng tlem em em mai bawk si, vei nei hi a ang ber mai, tichuan ka va in thiar dawn chhin ange aw ka ti a, ka tho a, inthiar ta lo chuan ka ṭawngṭai ta vak mai a, ka ṭawngṭai zawh chuan ka chhuak leh mai a Varanda ah chuan dingin Laipuitlang lam chu ka hawi chhova, a rawn min na zawn Vân lam chu a dum hian a dum duk kuih mai, a rawn minna zawn ah chuan eng em em in kawl a rawn phe zuai zuai  a. Chutia ka thlir reng lai chuan chhum hi(a rawn min na zawn)a rawn in let thla ta mup mup  a, ka hlau chu  inchhungah chuan ka lut a, kan pa mu lai chu Mawia khua a rawn thawk nasa dawn lutuk chhum a rawn let but but mai ka ti a(Kan kir leh lawk)chutia chhum a rawn let but but lai chuan ka en reng a, inchhung ka luh dawn ka hawilet chuan kan kawt hi chhum zing chuan a rawn thleng hman der a.

Tichuan kan pa chuan mu rawh min ti a, ka mu ve mai a, mahse ka muhil thei reng reng lo. Phone bawk chu ka khawih leh ta a, hla vel bawk chu ka thawn kual leh a, chutah ring tak maiin ṭek a rawn tla a, ka phu zawka A tlai tawh sia tiin, Sana ka en a dar 2:45a.m hi alo ni der tawh. Ka mut a rawn chhuak ṭan a, ka lukham hnuaiah chuan kan pa phone leh ka phone chu ka dah tha a. Ka muhil ṭep tih ah chuan rial rawn tla in inchung a rawn deng ang mai hian a rawn ri tuar a, rang deuhin Blanket chuan k  beng ka hup thuai a. kan pa in Ehhh a tih tuar hi ka hria a, chet ka han tum chu ka che thei reng reng lo. Kan in a chim tih pawh ka hre chuanglo Ka mangang chuan kan pa chu ka ko vak vak a. min chhang thei bawk silova. Mawia ka ti leh tuar tuar a, min chhang tu reng reng a awm silo Chutah kan fapa chuan  mangang tak maiin, Nu a rawn ti tuarh tuarh a, Eihh ah, bawihte tiin ka ko va, kan fapa chuan Nu khawnge i awm a rawn ti leh a, ka awmna ka hre thei tawh silova, hetah tih bakin chhan ngaihna reng ka hre lo. Kan fapa chuan a aw rawl tawp tawp a min kovin, i che thei em ati a, theilo Mate ka tâng, ka kawng a chin hnuailam hi enge mawin a delh ka ti a.

Kan fapa kan khum thlanga mu chu alo tâng ve reng chu niin a tânna aṭang chuan engtin tin emaw a rawn in hai chhuak hlauh mai, min ko vak vak chung chuan kanu, ka rawn chhan dawn che, i bân tal i ti che thei em ati a, Sai sirin chep lutuk maiah ka tang bawk si a ka bân dinglam chu theih tawp a lakchhuah ka tum hnuah ka la chhuak ta hrama thei leh theiloin ka ban chu ka vaia Blanket in ka hmai a tuam tlat bawk si han pawt hlim turin ka tanna a chep bawk si ka che thei bawk silova, chutah kan fapa chuan engtin tin emaw ka tanna lam chu a rawn rinzawn a, i bân phar chhuah tum teh, ka hmu theilo che ati a, theih tawp tak meuhin ka ban ka vai leha ka Kiu chin hi ka ti che thei ta ka va lawm tak em. Kawl rawn phe eng karah chuan min rawn hmu ruai ruai ta, mi rawn pan a, Mate ṭanpuitu au ang aw ṭawngṭai ang ka ti a, theih tawpin kan ṭawngṭai dun ta char char a, khatih lai khan kan manganna khan a vawrtawp a thleng hial ani. Lalpa, zah ngai thei Pathian i nih kha min ṭanpui la,min pui tur mi pakhat tal rawn tir rawh tiin kan theih tawpin kan ṭawngṭai a, Pathian kan au ani. Chutia theih tawp a kan ṭawngṭai lai chuan ka dangro chu ka ṭawng chhuak thei ta lova, ka tanna chunglam atangin tui dawn nge ni dawn ni, min khawh char char a, ka Kâ dawh tumin ka lu chet ka tum thin, ka chet thei silo. Tuiin min khawh reng chung chuan dang rovin ka awm tlat si. Ka fapa chuan Nu ngawi suh ṭawngṭai rawh, ṭawngṭai rawh min ti vak vak a, ka theih tawp tak meuhvin ka inti paukhauh a, thei leh thei lovin ka ṭawng chhuak a. Mate ka ngawi naa, ka rilruin ka ṭawngṭai a lawm, ka dang a ro ka tui a hal ka ti a, tui ka'n zawng ang aw a ti a, tui zawng turin a vak sawn a, tui zawng chung chuan a tawngṭai zel a, kei pawhin theih tawpin Pathian ka au va, tichuan vanneihthlak tak maiin, kan choka lama fridge chu ava ban fuh hlauh a. Harsa tak chungin tui bottle 1 a rawn la a, mi in tir a, ka inzo vek a. Kan ṭawngṭai dun leh char char a, Lalpa zah ngai thei i nih kha, kan tanna aṭang hian min chhanchhuak in, kan nunna min zuahsak hram rawh tiin. Kan fapa chu a theih tawp a ring leh ṭap chungin a tawngṭai a, Lalpa kei misual ṭawngṭaina hi chhan tlak ah i ngailo ami?ka nu hi min chhan chhuahsak rawh.  Ka nu ka hmu a, ka pa ka la hmu ve lo tiin a au vak vaka. Lalpa min pui rawh tiin a ṭap vak vak a, ka taksa chu a rawn hik mup mup a, engmah a hre tawhlo, Mate ka thi ve ngei dawn anih hi  ka kawng a chin hnuai lamin engmah a hre tawhlo, ṭawngṭai zel ila ṭanpui tu dil ang ka ti a, kan theih tawp a ringin ṭap chungin min pui ru tih leh Lalpa min ṭanpuitu tur, pakhat tal min pe rawh tiin kan au vak vak a, Mate ṭhenawm te ko vak rawh ka ti a, ṭanpuitu au chung chuan Pathian kan au mawlh mawlh bawk a, nakin deuhah chuan(kan let leh lawk kan fapain ka tanna bul arawn thlen chuan min tuamtu Blanket leh thosilen chu engtin tin emaw a pawt thler a, ka thawpik a zia deuh)kan fapa chuan Nu tun Minute ah hian Lalpan chakna min pe dawn ka chhan chhuak dawn che ati a, Mate ka thi ve ngei dawn e, min kalsan la in saseng rawh ka ti a. Nu i thih ka phal lo a tia, a ṭap vak vak a, kan ṭawngṭai chhunzawm leh a. Nu i chhuak ta theih tawpin rawn in tlawh khalh rawh ka nghawngah hian uai la ati a, ka ban chu a nghawngah chuan min dahsak a. ani pawh alo hliam nasa mai a (thisen a niang) a nâl emai. Mate ka vuan nghet theilo ka ti a,1.2.3 ti ila ṭawngṭai ang kan ti a,Lalpa tun darkar tun minute ah ngei hian min chhanchhuak rawh kan ti a ka fapa chuan min pawt vak a, i chhuak ta min ti a; Chu veleh lawmthu sawi ang kan ti a, Pathian hnenah min chhanchhuah avang leh kan dilna min hlawhtlin tir avangin lawmthu sawiin kan ṭawngṭai dun leh a, kan in chhanchhuak chu ani ta mai a.

Kan in him lamah a hnuh in min hnuk chhuak zel a, ka pa ka zawng dawn tih leh kan tanna lama zuanluh chu a rual nghal a. Kei chuan i pa tello chuan ka awm duh biklo tiin bawk vakin kan tanna lam chu ka pan veleh a. Kan pa chu ka ko vak vak a, Matea chuan ka pa ka koh ri che chu i hriaa min chhang theilo tiraw? Lo tuar hram hram rawh i fapa ka lo kal ka rawn chhan dawn che; Ka pa khawnge i awm tiin apa chu ṭap chungin ring deuh deuh vin a ko mawlh mawlh a Ka pa, ka nu chu ka chhan tawh a, ka rawn chhan ve dawn che ati a aṭap vak vak a. Kei(aNu) leh apa leh Pathian a koh chhawk char char a, apa ahmu ta silova, a beidawng lutuk chu nasa takin a ṭap a. Ka pa min ngaidam rawh, ka Nu chiah ka chhanchhuak a, ka chhan ve thei silo che a, i awmna ka hre bawk silo min ngaidam rawh aw i fapa ni tlak pawh ka nilo tiin ṭap chunga apa ko chungin ngaihdam a dil mawlh mawlh a,apa hnena ngaihdam a dilna au aw kha ka bengah a ri nawn awn awn thin. 

Ka awmna lam a rawn pan a, kei lah ka tanna ka kawng chin duh angin ka che thei silova, kan in kuah a, kan ṭap dun a, kan thlang lama mipui ri mum mum thawm chu kan hria ta. Ka theih tawp a ringin ka au a, hruizen rawn vawrh chho ula kan lo uai thla ang ka ti a, ka au ri an hriat chuan kan awmna an hre chauh ani. kan tan chhung zawngin kan nufa in kan theih tawpin kanin buaipui a, tuman kan awmna an hrelo, tichuan lo lungngai reng reng suh u khatah khan ani maw in awm  Leihlawn kan rawn dawh ange an ti a, kan tanna lamah chuan an lo chho va, Bang chu an rawn chhu chhia a, leihlawn chu an rawn dawh lut a chuta ṭang chuan min la chhuak ta ani

   Kan pa chu a awmna kan hre bawk silova, a thawm hriattur a awm bawk silo, a rawn rik ṭhuai a, Ehh a tih kha ka hriat hnuhnung ber  chu a ni ta ani, a tûk zing dar 11velah an hmu chauh va, ka tanna bang(slap) chep tak chuan a lo delh ve tho chu niin dar 11:30 velah an la chhuak thei hram ani.

   Kan tan chhung zawnga Pathian kan auhna kha, kan Pathian hian a hai lova, ṭanpui kan mamawh lai takin, ṭanpuitu hnai reng chu a hun takah alo che tak meuh meuh ani, Thinlung taka kan koh na kha min va chhang chiang em! Khatianga mangang em em a, thi mai thei dinhmun a kan din lai khan Pathian kohna chang hrelo ta ila tun hi kan thleng angem??kan Pathian hi Pathian nung fak tlak Pathian chu alo va ni chiang tak em. Eng anga hun harsa leh rapthlak pawh lo tawk mah ila kan Pathian hi i au zel ang u,Thihna ata min chhanchhuak tu kan Pathian hi lo ropui ber  rawh se Lalpa, kan lawm e.  Thihna ata min chhan chhuaktu ini si a.
A MEN

*Maruati Râltê*

(Thubelh he thu hi ziak tura sawmna ka hmuh avangin ziak ka ni. Ka ziak famkim theilo a thui lutuk dawn a, min lo chhiar chhuah sak hram turin ka sawm a che u).




## A ziaktu hi biakpawhna tur kan hre mai lova, amah zah tak chungin 5/11 hriatreng nan kan han chhawpchhuak a ni.

Post a Comment

0 Comments