Ticker

10/recent/ticker-posts

I WILL ALWAYS LOVE YOU

(In remembrance of those who died in a landslide at Laipuitlang 5/11)


Chu thlanlungah chuan 'Michael Lalbiaksanga, Kum 24. Thihni, ni 11 may 2013' tih a inziak kalh a, ka thiannu nen chuan chu thlanah chuan ngawi rengin kan thu dun a, a message chu ka han chhiarsak a, keipawh ka insum thei bik lo, tawng harsa ti tak chungin, he thawnthu lungchhiatthlak tak hi min hrilh ta a.

"Te, muhil tawh em, i khawsik a zia tawh em, ka ngai lutuk che a, la thinrim mi. Te, zing dar 2 a pel tawh, ka muhil thei lo, thinrim tawh lo la, min chhang duh bawk si lo hrehawm emai, tukverhah ka dak a, ruah a sur nasa lutuk, ka ngai che e, muttui aw." Ka tihtau avang chuan ka reply duh miah lova, ka khawsik ka tlun hluah hluaha.

Reilote ka lo muthilh hnu chuan Zing dar 6 velah a message chuan min tiharh leh a. Ka chhang duh chuang lo, "Te, ka hmu tawh lo mai thei che a, ka hmangaih che, Mangtha aw." "TE, ka hmangaih che, ka ke hi a na lutuk," " Te, min chhang teh, i aw vawikhat tal ka hre duh, te khawngaih takin" Chu chu a message ka dawn hnuhnun ber a ni.

Tlemte ka chhing leh sek hnua ka han harh chuan, ka phone-ah chuan miss called vawi 12 lai a lo awm a,a ruk tak chuan ka nuih a za angreng. sana ka han en chu dar 8 a lo ri tep tawh a, a thinrim ve tak tak hlau rilru takin ka phone a. Not reachable a inti zel a, nidanga chutianga awm ngai hlei lo, tun ataka a signal a han nei lo vel chu ka thin a tirim ngang mai. ka mumangah ngaihzawng dang a lo nei kher kher nen, signal a neih veleh a hmuh ngei turin titau tih hriat takin message ngeiawm tak ka hnutchhiah talh pek a, tun hnu thlenga ka inthiam lohna tur a ni tih reng ka ring pha lo.

Ka mumang vangte leh signal a neih loh vanga Thinrim tun chunga choka lama ka phei lai chuan, Ka nu chuan bawihi laipuitlang kha i hre ve em a rawn ti a, ngaihtuah lem lo chuan 'hre ve bawk e' tih pahin bathroom ka luh san nghal a. Laipuitlang hre lo tura min ngai chu ka ngei ru ang reng khawp mai. In a chim a, tah chuan ka hmangaih kha a tel ve tih reng ka la hre ve lo. Ka khawsikin min la kiansan loh avangin chaw pawh ei lo chuan ka room lamah ka phei leh nghal a.

A message hmuh inring takin, ka phone chu ka han en a,engmah a lo awm lo. Tihtur awm lo nen, mut pah chuan facebookah ka han lut a. Nidanga ka tih thin ang bawkin, a thlalak chu ka han en leh hmasa ber a, engang pawn titau mah ila, ani chu ka en ning thei lo. A thlalakah chuan Mapuia'n a lo comment ngei a, "Michael an la hmu lo che maw;-(" tih a lo ni a, hemi te thiandun tak hi chu aw, ka ti rilru a, ngaihthat lohna engmah ka nei lo, Special report lam chu ka han en a, nizan ruah sur nasa tak avanga laipuitlang in chim chu an lo post chuai chuai a, ka nu sawi awmzia pawh ka hre chhuak uai uai mai. Ka lainat lutuk chu ka hnuk a ulh thei nia mawle. Mahse ani kha chu a tel ve hi ka ring pha mawlh lo. A nite kha chu a kar hmasa lawk khan an inluah an sawn a, kha laipuitlang in chimah khan a tel ve ang tih ka ring pha lo. Chutia ka fb kual vel mai mai lai chuan micheala cousin Angelai chuan min rawn phone a." Rose, michaela kha, laipuitlang inchimah khan...." a tia engmah a sawi zawm thei tawh lo, enge sawi rawh ka tih pawn a phone a lo dah hman tawh a.

Kha thu ka hriat khan ka å vekin ka hria. A message chu ka han chhiar nawn leh a, ka ke a na a rawn tihte chu rin zawn dan ka thiam ta uarh uarh mai. Dan rual lohvin ka mittui chu a dir zung zung a. Ka phone ka thlauh lai awm reng reng pawh ka hre lo. Kha thuin min thawn laia a aia thu na hi ka la dawng ngai lo. Kut khur zawih zawihin khum bula ka phone tla chu ka han chhar a, a lo lak mial takin tih thuah Michaela chu ka phone a, vawi 20 dawn ka beih hnu pawh chuan a tlang thei chuang lo. A ni thei lo , a thih chu ka phal lo bur a nimai. A thi dawn bawk hek lo tiin beidawng duh lovin ka phone tlauh tlauh a, ka kut a khurh nasat luat avangin phone pawh chu ka thlauh lo chauh a ni,vawi 50 dawn ka phone hnu chuan a inring ta hlauh mai. Hetih hun lai hian zing dar 10 vel a ni, Ka lawmzia chu sawíin a siak lo. . Michaela ngei chu a ni, a lo chhang a nih chu.

Thaw ri hrawp hrawp ka hria a. Michaela ngei a ni. Ka, biangah chuan mittui a luang ngiai ngiai a, "michael i tha maw, michael, michael min chhang rawh" ka ti vak vak a,ka tap ri te chu a tan ngaihthlak a va nuam lo dawn tehlul em! "Te, boruak a rawn lut, a eng riai riai, min hmangaih tiraw, ka hmangaih......." tawng chhunzawm tur a awm ta lo. Michael kal suh, tawng rawh tiin ka au vak vak a mahse chhanna a awm tawh lo. Ka tap aw rawl ri avang chuan ka nu chu ka roomah a lo tlan lut vat a,ka nu chu ka kuah thlawp a. Zah pawh ka sawi thei lo. . Chutih lai tak chuan LPS-ah chuan Tunah khan, Michael Lalbiaksanga ni awm tak chu a ruang lak chhuah mek a ni a, chhan hman a ni ta lo tiin an ln puang ve mek bawk a. Chu bak engmah ka hre lo. Ka harh leh chuan zan a lo ni tawh.

Ka thiannu chu a ngawi vang vang a, keipawn han sawi tur mai ka hre lo. "Ka hmangaih thu ka lo hrilh loh kha ka va inchhir tak em" tiin a mittui luang hruk pah chuan rose ken chu a dah ta a.


(Instagram lamah a ziaktu hi follow/biakpawh duh tan a hmingah hian hmeh mai tur a ni.



Post i hmuh dan

Post a Comment

0 Comments