'Ka U Liana' tlangzarh a ni ta; Tlangzarh zana enhonaah ṭahpui an tam!

 Aizawl | May 30, 2022: Mizo film thar 'Ka U Liana' chu hun rei tak buatsaih a nih hnuah May 28 zan khan Padma Shri - B Sangkhumi'n Vanapa Hall-ah a tlangzarh.

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


He hunah hian sawm bik leh ticket 300 hralh chhuah leitute'n an en ho a, ṭahpuitu an tam hle!

Esther Lalnunmawii leh Vanlalhmangaiha te channa film hi a hmuhnawmin mi tam tak a vêl a, u mi ang lovin a nau a hmangaihna chuan entute thinlung a hneh hle!

"He Film hi unau thawnthu niin Mawlmang tak leh Mizo Society leh rilrem theih dan tur ber-a buatsaih a ni a, Mahse, chutih rualin Script/story kan buatsaih tawh a zawnga harsa leh hautak ber ala ni thung!" tiin director/script writer Mike chuan instagram-ah post a lo siam tawh a ni.



'Ka u Liana' film ah hian Mizo zaithiam lar Thawhlehnaniropuia a inlan a, 'Sisi sirah mi hnawl hma hian' tia hriat lar Vanlalhmangaiha kan hmu a. Anni pahnih bakah hian Anchor hriat hlawh chho mek leh Presbyterian Choir Lunglei member Esther Lalnunmawii, Miss Chapchar Kut leh Miss Mizoram aṭanga hriat hlawh Abigail Lawmsangzuali, Duhaisam film changtunu Ruthi Chenkual, Host & Anchor zei leh hmelṭha Laltei Fanai te bakah ṭhalaite hriat hlawh mi tam tak an inlan a ni.

Hmangaiha hla chu:



'Ka U Liana' thawnthu hi Aaron Malsawmdawngzuala ziah a ni a, Director hi Mike Lalsangzela niin, Aruata Fanai chu Assistant director a ni a, Camera hi Ruattea, Jacob Lalfakzuala leh Mike in an khawih a, script pawh hi mike ziah a ni nghe nghe!

'Ka u Liana' OST hi Zaii Hauchhum in a sa a, Youtube ah dah a ni.

He film hi RUNMAWI.COM ah dah a ni tawh a, cheng 250 in lei theih a ni.

'Ka U Liana' hi Zote Entertainment leh Runmawi in an tihchhuah a ni a, anni thawhhona hrinchuah film hi a nêp lo hle!

'Ka U Liana' film Shooting hi March thla aṭanga ṭanin, May thla kar tirah zawh a ni a, director Mike chuan, "Kan theihtawp kan chhuah a ni." a ti!

He filmah hian Govt Hrangbana College (HBC) i hmu mawlh mawlh dawn a, Sihphir khua i hmu mawlh mawlh a nih pawhin mak ti suh!

A changtute:
An chang thiam a, an mahni role ṭheuh an hneh em em a, a changtunu ber Estheri ṭap hmel pawh "a ṭap tak tak lai an lo record a ang," ti tawk an awm!
Hmangaiha a role a hneh em em a, "thla 4 dang chu chan belh se filma a mizia ang tam tak hi a pu tel mai ang em?" an tih khawpin a chanpual a hneh!


He filma a sual lama chang - Ruthi Chenkual, Abigail leh Joe te pawhin an chanpual an hneh hle a, a hmuna entute zingah, "a takah hian ka ngei lek lek zawk!" titu an tam a, film an en hnu hian mi tam takin an ngei sup sup ang tih chu a hlauhawm!

misualnu leh a fuihpawrhtute. hihi

Lemchan zirna sikul chhuak awm miah si lovin an role an hneh hlawm hle a. An thiam tia sawi hian a tawk mai!

Mizo ṭhalaite hian an duh leh tum lamah chuan theihna an nei a, chumi kawnga kaihruaitu chu an mamawh mai chauh a nih zia he film aṭang hian a lang chiang hle!

He film i en zawh hian sawiselna tur leh duhthusam loh a awm zeuh zeuh ngei ang, chu hunah chuan, Mizo film industry hmasawnna atan an theihtawp an chhuah a ni tih hi i rilru ah i lo dah ve reng dawn nia!




Post a Comment

He post chungchanga i ngaihdan lo sawi ve rawh:

Previous Post Next Post