CM-in Aizawl leh Behliangchhip inkar tlan tur 'Hnam Inpumkhatna Bus' vai liam

Aizawl the 9th May, 2022: Chief Minister Pu Zoramthanga chuan tukin khan Directorate of Transport, Tuikual kawt atangin 'Hnam Impumkhatna Bus Service' hmasa ber (Aizawl leh Behliangchhip Inter-state service) chu a vailiam. Hemi pual hian Transport Directorate ah inkhawm tawi buatsaih niin Transport Minister Pu TJ Lalnuntluanga chuan a kaihhruai a ni.


Chief Minister chuan hripui leng avanga tihhlawhtlin lawk theih loh, tuna Mizoram leh Tripura Zofate khua inkara bus a service thei ta chu lawmawm a ti a. Khawthlang lam, Tripura panna kawng chu tha zawka siam a nih zel thu leh, Tripura sawrkar pawhin an ram chinah hma an lak ve bawk thu sawiin Chief Minister chuan helai kara bus leh lirthei dang service te tan inkalpawhna nuam zawk an neih a, awlsam lehzuala an service theih beisei a nih thu a sawi. Chief Minister chuan Mizoram hualtu state dang leh ram danga kan unau chengte nen kan inpumkhatna a lo thuk zawk a, awlsam zawka kan intlawhpawh theihna turin hetiang lirthei service hi hmachhawp a nih thu sawiin, kan unaute intlawhpawh chak tak tak te tan remchanna siam sak a, inpumkhatna tha zawk neih theih nan hma lak mek a nih thu a sawi.



Transport Minister Pu TJ Lalnuntluanga chuan hnam inpumkhatna chu sawrkarin a ngaihpawimawh pakhat leh a thiltum a nih thu sawiin, ram leh hnamin hma a sawn theihna tura hmalakna chuan material infrastructure ringawt a huam loh thu te, hnam zahawmna leh inpumkhat tha neih tel a pawimawh thu a sawi a. Hnamdang ngaihsanna leh mahni hnam nihna zahpuia sawi nep na hian hmasawnna tak tak a thlen loh thu te, hmasawnna tluantling nei tur chuan kan culture a innghat a hma sawn tum a ngaih thu a sawi. Transport Minister chuan hnam tlem te kan ni a, kan hnam hi kan inpawh that a ngai zual hle a ni tiin tuna bus sevice pawh hi chumi rilru pu chunga ruahman a nih thu a sawi a. Zofate kan inpumkhatna hi kan Zo hnam zahawmna leh ropuina a ni, a ti. Bus service na tur atan hian hun khirh lai ber hripui len laia Chief Minister hmalakna in bus leina tur atana sum mamawhte leh a tul ang ang buaipui a nih dan leh vawiina Jampui tlang dunga kan Zohnathlak unaute nen inkalpawhna tur Hnam inpumkhatna Bus a zara vailiam a ni ta chu lawmawm a ti a. Hnam inpumkhatna chungchangah Zoram pum anga tangrual in, pawl hrang hrang te pawhin an phur chu lawmawm a ti a ni.

Tukin Hnam inpumkhatna Bus vailiam naah hian Dy. Speaker Er. Lalrinawma, Tourism Minister Pu Robert Romawia Royte leh MLA Pu Lalrinsanga Ralte, Pu Ramthanmawia leh Pu Zothantluanga te an tel bawk.

Hnam inpumkhatna Bus Service hi Aizawl leh Behliangchhip inkar tlan tur niin, a chuan man (bus ticket man) hi passenger pakhat ah Rs. 476 a ni a. Thawhtanni leh Ningani zing dar 6 ah Aizawl atanga chhuak a, Thawhlehni leh Zirtawpni zing dar 6 ah Behliangchhip atanga chhuak thin tura ruahman a ni.

Post a Comment

He post chungchanga i ngaihdan lo sawi ve rawh:

Previous Post Next Post