Ticker

10/recent/ticker-posts

Union Minister of State Bhagwant Khuba in Mizoram a tlawh

Aizawl | April 28, 2022: Sawrkar laipui Ministry pahnih New & Renewable Energy leh Chemicals & Fertilizers changtu Minister of State Pu Bhagwant Khuba chu vawiin khan Mizoram a lo thleng a. Vawiin chawhnu khan Aijal Club-ah Mizoram Chief Secretary Dr Renu Sharma hovin Power & Electricity Department, Agriculture Department leh Tourism Department official te nen meeting an nei a ni.


Mizoram Chief Secretary Dr Renu Sharma chuan Union Minister of State Pu Bhagwant Khuba chu lo lawmin, Mizoram State dinhmun tlangpui te, mipuite eizawnna leh khawtlang nun te, Mizo culture leh nunphung te, India sawrkarin a ngaih pawimawh em em Sustainable Development Goals (SDG) a Mizoram hmalakna te a hrilh a ni.


New & Renewable Energy changtu Minister of State a nih angin Mizoram State Power Secretary Pu Lalengmawia chuan kawlphetha a Mizoram dinhmun tlangpui a tarlang a. Kawlphetha mamawh san lai berin 155 MW mamawh a nih thu te, tui chakna hmanga kawlphetha siamchhuah zat 29.35MW a nih thu te, ni zung chakna hmanga kawlphetha siamchhuah theih zat 3.85 MW a nih thu leh kum 2021-22 chhungin solar power 3.39MU siam chhuah a nih thu a sawi. Mizoram ah hian 2MWp Tlungvel Solar Plant, 1555kWp rooftop solar bakah Sihhmui, Melriat leh Khawivaah Grid Connected Solar Plant 100kWp theuh a awm thu meeting ah hian Power Secretary chuan a tarlang a. 20Wp Solar Park Vankal chu March 2023 ah zawh theih beisei a nih thu leh 10MWp Solar Project Keifang chu June 2022 hian zawh tum a nih thu a sawi bawk.

Agriculture Additional Director chuan Mizoram chhunga chemical fertilizers kan hman dan leh mamawh dan tlangpui a tarlang a. Mizoramah hian hectare khat zelah chemical fertilizer 70 kg zel hmang thin anga chhut a ni. Fertilizer wholse sale dealer 19 leh retail a hralhchhuahna dawr 67 te chuan Mizoram puma fertilizer mamawhtu farmer te an chawm mek a ni. Oil palm chungchang sawiin Mizoramah 26,730 ha ah oil palm chin mek a ni a. District pasariha khaw 197 ah oil palm chin niin sawrkar thawhpui company te chuan kg 1 zelah cheng 10 huin farmers te hnen atangin an lei thin a ni.

Tourism Director pawhin meeting ah hian tourism a Mizoram hmalakna hrang hrang a tarlang a. Zin mite tana Mizoram tlawh a chakawm na chhan te, Responsible Tourism Policy an neih thu leh an hmachhawp thenkhat te meeting-ah hian a tarlang a ni.

Minister of State hian vawiin vek khan Chemical Fertilizer zawrhna dawr te a hmunah a tlawh nghal bawk.

- DIPR
Post i hmuh dan

Post a Comment

0 Comments