Thihna hnehtu Ukil/Advocate ropui, Isua Krista chu!

(A legal perspective)

- K Remruatfela

Isua Krista, thihna hneha a thawhlehna thu hian ringhleltute zingah inhnialna a chawk chhûak nasa hle a. Amaherawhchu, tun tumah chuan chutiang lampang chhui lovin, Pa thutiam anga thihna hneha a lo thawhleh thu leh chumi hnua Lal Isua an khenbeha a thih chiah atanga Vâna a lâwn nî thlenga thil thleng hrang hrang in dawt dân kan rawn chhui cho ang.

1. Pathian biak in puan zâr chu a chung lam atangin a hnuai lam thlengin a lo thlêr chhuak a, lir a nghing a, lungpui a khi chat a, thlân a lo inhawng bawk. (Mat. 27:1,2.)

2. Mari Magdalini, a kawchhûng ata ramhuai pasarih a hnawhchhuaha hnênah a inlâr. Hei hi Thawhlehna hnua Isua Krista inlârna hmasa ber a ni. (Mk. 16:9)

3. Emmau khaw pana kal mipahnihte hnenah a inlâr a. Zawlnei ten thu an lo hrilh lâwk thlen dikna a nih thu a hrilhfiah. (Luk.24: 13 - 35)

4. Chumi hnuah a Zirtirte hnenah a inlâr a. Thlamuanna nei turin a chah a.  Thlarau Thianghlim zâra sual ngaihdamna hial nei thei tura rinna kawnga mi chak ni turin a thâwk khum. (Joh.20: 19-23)

5. Ringhleltu, a zirtirtu Thoma hnenah a inlâr leh a. Isua Krista hi thihna hnehin a tho leh a ni tih thu hmu lo pawha ring tawp tute an nihlawh thu a sawi. (Joh.20:29)

6. Tiberia díla a zirtir pasarih (7) sangha man tuma insingsa mêk te hnenah a inlâr a. Tuk thuan ei zawhah Petera a fâlin a kâwm a, Krista chanchin tha puangdarh tura Pathianin a bik taka a serh hran a nih thu a hrilh a. A sangha den lai kalsana Krista Chanchin Tha chu hun puma pu darh turin thu a pe. (Joh. 21:19)

7. Zirtir sawmlehpakhat (11) te chu Galili rama, tlâng pakhatah Isua Krista in a hruai chho a. Lei leh vâna thuneihna zawng zawng pêk a nih tawh thu leh ram tina kala Isua Krista thihna hneha a thawh leh tawh thu Chanchin Tha chu puang darh a. Pa leh Fapa leh Thlarau Thianghlima hminga Baptist zel turin thu a pe. Hei hi Isua Krista, Vâna hruai chhoh a nih hmaa a thuchah hnuhnung ber a ni a. Thupek a nih angin ringtute pawh hian kan ngaih pawimawh em em a ngai a ni. (Mat.28: 16 - 20).

8. Chutichuan, Lal Isua chu a Zirtirte hnena thu a sawi zawh hnuah chuan Vânah hruai chhohvin a awm a. Pathian ding lamah a han thu ta a. Rorelna ni ropui a lo thlen hunah kan aiawhin min la  dinsak theuh dâwn a ni. (Mk.16: 19-20)

Heng a chunga Isua Krista, thihna hneha a thawhleh hnua a inlârna hrang hrang kan hmuha, kan chhinchhiah tur pawimawh  em em ni ta chu - Isua Krista hian rorelna ni ropui a lo thlen hunah kan aiawhin Lal (Pathian) hmaah min la dinsak dâwn a ni tih hi a ni. Fakna hla siam tu in _'Ka aiawh Lal hmaah a ding, ka hming a kutah a chuang e,'_ (KHB No. 376) a lo tih tawh angin Isua Krista hian kan aiawhin Pathian hmaah thiam thu min la sawi sak dâwn a. Chutihlai erawh chuan, thiam thu sawi tur nei lovin kan damchhung nî te kan lo hmang ral mai ang tih erawh a hlauhawm takzet!

A ni taka, he khawvel rorelna (Court) ah pawh Dân hremi, Ukil/Advocate kan tihte hian Thubuai remtu 'Magistrate/Judge' hmaah kan Client apiangte thiam chang an nih theih nan theihtawp chhuahin an thiam thu kan sawi sak thin a. Thiam thu sawi tur nei lova, thuawih loh hrim hrim avanga suahsual rawng bawl thinte hi chu thiam thu sawi sâk an har thin em em a, thiam chang zo lovin hrem (Convict) an nih phah thin châwk. Chutiang bawk chuan, Isua Krista hian rorelna hnuhnunga Pa hmaa kan thiam thu min sawisak ve dâwn hunah thiam thu sawi tur nei lova kan damlaia a thupek leh thuchahte zâwm lova thuawih lova suahsual rawng kan bâwl lui ve tlat a nih chuan thiam chang zo lovin, chatuana hrem ni turin HREMHMUNAH kan tla ve mai ang tih a hlauhawm takzet! A râpthlak em em dawn si a. Chuvangin, hawh u, keini ringtu, thawhlehna tawmpuitute hian Isua Krista Chanchin Tha hril hi hna pui berah i nei tak meuh meuh ang u.

_Kristian, tho r'u, mu rei s'u,_

_Tap kan chawlsan dâwn em ni?_

_Lalpan thu min pêk lai hian,_

_Kan thu mai mai dâwn em ni?_