Ticker

10/recent/ticker-posts

Sawrkar-ah mipuiin rinna an nghat, Sikul enrollment a pung - School Education minister

Aizawl | April 6, 2022: Tuivawl bial chhung tlawh kual mektu School Education Minister Pu Lalchhandama Ralte chuan  sawrkarah mipuiin rinna an nghat a, School luh țanniah sorkar sikul  tam takah hming ziak an pung a, hmasawnna lawmawm tak a ni a ti.


Minister hian tukina Sakawrdai VC House-a amah lo dawngsawngtute hnenah thusawiin sawrkar sikula naupangte inziahluh dan hmun hrang hrang ațanga report an dawn danin sikul tam takah naupang lut an pung a,  hmun țhenkhatah phei chuan sikula leng lo khawp leh țhutthleng leh dawhkan neihsa pawhin a daih loh khawp te pawh an awm a, class room zauh belh ngai te, hmun țhenkhatah phei chuan room sak belh ngaite an awm hial a ni a ti a. Sawrkarin zirna kawnga hma a lakna mipuiten an ring a, enrolment a pung thut chu luhaithlak lawmawm si a ni a ti.  Hun kal tawhah sawrkar sikula lut tur naupang an tlem  avangin sikul khar engemawzat a awm tih sawiin tun dinhmunah erawhchuan sawrkarin zirtirtu indaih lohna phuhruk nan a theih chin chinah zirtirtu a dah belh a, hei hian naupang tam tak a hip a, Sawrkar sikul a lun chho leh mek a ni a ti. Minister chuan sawrkar sikula enrolment an pun avanga harsatna awm te khawtlang hruaituten lo enzuipui tur leh a theih ang anga sikul mamawh lo ngaihtuahpuia, an bialtu MLA te nen a țul dana zira a chinfel dan lo dap turin a ngen a, sikul țhenkhatte phei chu a leta naupang pungte an nih thut avangin sawrkar tan pawh chawp leh chilha han chinfel mai buaithlak khawp te a ni a, sikul bul hnai hall hman rih ngai te pawh a awm tih sawiin a theih ang anga sikul naupangte len theih dan lo dap turin mipuite a sawm a ni.

Minister hian Khawpuar leh Vaitin te pawh a tlawh a, sawrkarin hmasawnna hna a thawhah te țangruala lo thlawp țhin turin a sawm a, SEDP pawh a hlawhtlin ngei theih nan  dik taka hmang tur leh din chhuahna atana bul țan nan hmang turin a chah bawk.


- DIPR
Post i hmuh dan

Post a Comment

0 Comments