Mara Autonomous District Council inthlan May 5-ah; May 9-ah vote chhiar

Siaha | April 6, 2022: Returning Officer(R.O) to 1-25 MDC Constituencies, MADC leh Siaha bawrhsap ni bawk Pu Lalsangliana chuan Mara Autonomous District Council (MADC) inthlanna chungchanga Mizoram State Election Commission thuchhuah bawhzuiin, DC conference Room-ah MADC inthlanna lo awmtura INTHLANNA HRIATTIRNA chu tichhuak.

MADC inthlan hi May 5 ningani zinglam dar 7:00 leh tlailam dar 5:00 inkarah Vote a thlak a ni a. May 9-ah vote chhiar tur a ni.

1. Mara Autonomous District Council hnuaia 1-25 MDC Constituencies Member Inthlanna, 2022chu neih tura tih a ni.

2. Nomination paper hi Returning Office, 1-25 MDC Constituencies Office (Election Branch, Siaha)-ah office kai hun chhungin ni 13/04/2022 (Nilaini Ni) thlengin lam theih a ni ang.

3. Nomination paper-te chu Candidate emaw a Candidate-turin emaw Asst. Returning Officer, 1-25 MDC Constituencies under MADC,2022 hnenah Office kai ni (Sorkar Chawlh Ni nilo) Ni. 06/04/2022 (Nilai Ni) atanga Ni 13/04/2022 (Nilai Ni) thleng zing dar 11:00 leh tlailam dar 3:00 inkar chhungin thehluh theih a ni ang.

4. Nomination paper-te chu ni 13/04/2022 (Nilai Ni) tlai lam dar 3:00 atangin chik taka endik nghal an ni ang.

5. Candidate atanga inhnukdawk duhte chuan, Candidate emaw a Candidate-tu emaw a Election Agent-in emaw Candidate-in ziaka phalna a pekin Returning Officer, 1-25 MDC Constituencies under MADC,2022 Office-ah ni 18/04/2022 tlailam dar 3:00 aia tlai lo thleng thehluh theih a ni.

6. Candidate-te tihchian a niha, chuhtu an awm chuan, inthlanna ni 05/05/2022 (Nilaithawhtan Ni) zinglam dar 7:00 leh tlailam dar 5:00 inkarah Vote a thlak a ni ang.

7. Vote thlak that ngai a lo awm hlauh chuan, ni 06/05/2022 (Zirtawp Ni) zinglam dar 7:00 leh tlailam dar 5:00 inkarah Vote thlak a ni ang.

8. Vote chhiarna hi ni 09/05/2022 (Thawhtan Ni) zinglam dar 10:00 atanga a zawh thlengin chhiar tur a ni ang.

Returning Officer Pu Lalsangliana chuan MDC Inthlanna lo awm turah MJA Siaha te chu District Administration tawiawm tur leh thawhpui tura sawmin, a tulna piangah thurawn te pawh pe thin turin a sawm hlawm a. Chuti rual chuan MJA member te pawh Neutrality vawng tlat turin a chahin, Democracy ramah chuan Chanchinbu mi te hian Inthlanna felfai leh thianghlim a awm theih nana mipuite zirtirna kawngah mawhphurhna sang tak an nei a ni, a ti.

Vawiin Returning Officer in MADC Inthlan hriattirna a puan inkhawm tawite-ah hian Siaha MJA te bakah DC office-a officer te leh DIPRO te an tel a ni.