MZP-in ramri tlawh; ramri humhalh turin CM-ah rawtna thlen

Aizawl | April 7, 2022: Mizo Zirlai Pawl (MZP) General Headquarters hruaitute chuan ninmin khan an president Lalnunmawia Pautu hoin Phainuam Buarchep rama Assam lei dawh leh Bairabi Zophai hmuna Mizoram lei dawh mek chu a hmunah tlawhin an enfiah.



MZP hruaitute chuan state pahnihte inremna Status Quo tha taka Mizoram Sawrkarin a zawm lai leh Bairabi Zophaia lei dawh mek pawh laklawh taka chawlhsan a nih mek laiin, Assam lamin Phainuam Buarchepa Status Quo chhung Assam Police te duty-na piah lamah thir leihlawn tha tak mai hun reilote chhunga a dawh chu hriatthiam har an ti hle a. Kutthlaklo tura state pahnihte inremna (Status Quo) zah loah Assam sawrkar chu an ngai a an dem takzet a ni.


Mizoramin hmathar a lak apianga Assam lamin an rawn ngaihmawh em em laia, Assam lamin Status Quo chhungah hma thar a la thin hi MZP chuan tha an ti lova. Assam lamin hetiang hmalakna a kalpui fo avangin, Bairabi Zophaia Mizoram sorkarin lei a dawh mek; hun rei tak chawlhsan tawh chu chhunzawm ve nghal turin MZP chuan thuneitute an ngen nghal a. "Kan ram kan chan zel loh nana kan ramri uluk taka vil turin leh Assam chet dan uluk taka thlithlai reng turin MZP chuan thuneitute a ngen nghal a ni." tiin an thuchhuah chuan a tarlang.


Heng MZP duhdan hrang hrang leh ramri humhalh tura hmala turin vawiin ni 7th April, 2022 (Ningani) chhun dar 12 khan MZP president hovin, MZP Headquarters Kolasib leh MZP Sub Headquarters Vairengte president te chuan Mizoram Chief Minister Zoramthanga chu a office-ah an hmu nghal a. Chief Minister chuan a tul anga MZP rawtna hrang hrangte lo bawhzui a, lo enzui a tum thu a sawi a lawmawm kan ti hle a ni.

Post a Comment

He post chungchanga i ngaihdan lo sawi ve rawh:

Previous Post Next Post