Mi pahnih chempuiin sat; kutthlaktu a hnuah boral?

Aizawl | April 18, 2022: Vawiin chawhnu dar 2 vel khan Sangtea kum 40 mi vel nia hriat chuan Nghalchawm balu kai (Boaisua kai) Tlawng kamah Nghalchawm khaw mi ve ve; Pu Lalbiaknia (29) fa 3 nei leh Tv Lalrinnunga (27) te chu chempuiin a sat a, hliamte hi Sairang damdawi in panpui an nih hnuah Pu Lalbiaknia (Nitea) hi a serious deuh avangin Aizawl lamah refer a nih angin Aizawl Civil Hospital lam panpui a ni. 

Pu Lalbiaknia (Nitea) hian a tukkhum thlungah hliam na tak a tuar a, Tv Lalrinnunga hi a awmah Sangtea hian thuk takin a sat bawk.

Thu dawn danin, Sangtea tia hriat hian kum 2016 khan Sihhmui khaw mi Pu Lalkaia leh Tv Lalramlawma te chu thingfakin a lo vaw hlum tawh a, Tv Lalramlawma leh Pu Lalkaia te hi an lu-ah na takin a vua a, Tv Lalramlawma hi hemi ni hian a thi a, a tukah Pu Lalkaia hi a boral zui ve leh ta a ni.

Khatih hun lai khan Sangtea hi Sihhmuiah mikhualin a awm thin a, tual a thah avangin jail lamah a tang zui ta a, Jail atanga a chhuah hnuah Sihhmui lama awm zui lovin, Nghalchawm lamah mikhualin a awm zui ta a. Nghalchawmah hian kum 4-5 vel a awm tawh niin an sawi. Tunlai hian Tlawng kam lamah a tap deuh chawt a, kum 2 vel chu khuaah a awm meuh tawh lo.

Sangtea'n a tukkhuma a sah Nitea nau, a farnu chu Sangtea hian a star thin a, tlema huih phai lam deuh nia a lan avangin Nitea nau hian a hlau thin hle a, biak pawh a be tha ngam ngai lo. Hun a lo kal zel a, Nitea farnu hian pasalte neiin, tunlai thal tui tlem lai hian an pasalte nen Tlawng kam lamah riahbukte sualin balu lain an riak a, thlakhat chuang zet chu balu lain Tlawng kamah hna thawkin an riak tawh a ni. 

Vawiin khan Tlawng kama an awm ho laiin Nitea thianpa Rinnunga chuan Sangtea chu hun kal tawh sawiin a fiam a, Sangtea lah lo thinrimin an inhnial ta a, a hnu lawkah an kal darh leh ta mai a, engmah sawi zui leh innial pawh a awm zui lo. Lalrinnunga chu luiah inchiah thlan daih tumin lui kamah a ding a, Pu Lalbiaknia (Nitea) pawh tui dai tumin an thlang lama JCB ding chu a thlir a. Hetih lai hian Sangtea chu chempui nen rawn tlanin zuang meuhin Nitea inringlo lai chu a tukkhuma a sat ta chawrh mai a, Rinnunga chu va pan hnai lehin, Rinnunga erawh a lo inring hman a, a sat fuh mai thei lo. Vawi li vawi nga a chempuia a vai hnuah a awmah a sat fuh ta a ni.

Buaina thlenna hmun hi balu kai a nih angin hnathawk engemawzat an awm a, hliamte hi rang takin an bawihsawm nghal a, Sangtea pawh man bertin Nghalchawm lam an panpui a, VC house lamah police lo kal nghakin khawtlang hruaituten an lo veng a ni. Chanchin buatsaih mek lai hian Sangtea hi a boral zui ve ta niin thu kan dawng a, chanchin chiang zawk ngaihchan mek a ni.

- Mizo Special Report