Burma raltlan te'n zirna an chhunzawm theih nan MZP-in School Education minister kawm

• HSLC leh HSSLC result felfai theih nana theihtawp chhuah turin MBSE thuneitute ngen

Aizawl | April 25, 2022: Mizo Zirlai Pawl (MZP) General Headquarters hruaitute chuan vawiin khan School Education Minister Pu Lalchhandama Ralte chu a office-ah an hmu a. Myanmar ram buaina avânga Mizorama hima zawnga lo tlan kan unau, zirlaiten an zirna an chhunzawm theih dan tur an sawipui.

MZP chuan kan unau Mizoram a himna zawnga lo tlan zirlaiten an zirna an chhunzawm theih nan ruahmanna ṭha zawk siam turin Education Minister an ngenna chu, Minister chuan ṭha a tih thu leh hmalakna chak taka kalpui mek a nih thu a sawi a. Zirna Document/ Education Certificate felfai tak neite tan chuan admission leh zirna chhunzawm kawngah harsatna engmah a awm loh tur thu Minister chuan a sawi.

MZP chuan vawiin vek khan Mizoram Board of School Education (MBSE) hotute chu an office-ah a hmu a. HSLC leh HSSLC exam neih zawh takah result dik leh felfai zawk a awm theih nan theihtawp chhuah turin a ngen a. MBSE hotute chuan result dik leh felfai nei tura theihtawp an chhuah thu an sawi a, kum danga harsatna awm thinte pawh a theih ang anga pumpelh a nih theih nan endik kawngah pawh kumdang aia uluk zawka hma an lak thu an sawi. 

MBSE chuan kum dang zawng aia uluk lehzuala hma an la niin MZP chuan a hria a, beiseina sang tak nen a thlir mek a. MBSE hmalakna leh hmachhawp hrang hrangte pawh an sawiho a ni.