Assamin buarchep ramah lei dawh zo; MZP hruaitute'n a hmunah kalchilh nghal dawn!

Aizawl | April 5, 2022: Tunhnai khan Assam lam chuan Phainuam khua Buarchep ramah Thir Lei rawn dawhin, an lei dawh hi an dawh zo tawh niin thu dawn a ni a, he thu bawhzui hian MZP general headquarters president leh general secretary te chuan naktuk hian a hmun an pan dawn.


Assam Police te chuan tunhnai khan Kolasib District chhung Phainuam Buarchep khaw bul leilet kam, Buarchep lui leh Saihapui lui infinna atanga meter sawm vel a hla ah thir Lei dawh kai an tum chu nimin khan Lei an dawh zo nia thu dawn a ni.


Hemi chungchang ngaihtuah hian Mizo Zirlai Pawl (MZP) General Headquarters chu an president Lalnunmawia Pautu hovin vawiin  chhun dar 12:00 khan Extended Office Bearer & Adviser te an ṭhukhawm a, Phainuam Buarchep rama Assam sorkarin thir lei (Bailey Bridge) a dawh chu enzui an tum ni.


MZP chuan thuchhuah siamin, "tunhnaiah Mizoram chhung Buarchepah Assam sorkarin lei a rawn dawh chu hriatthiam har a ti hle a. Mizoram leh Assam sorkar thuneitu ten thua inremna siamin helai hmun hi khawih lo tur leh kutthlak lo tura inremna a awm laiin Mizoram lam chuan he inremna hi tha taka a zawm laiin hetiang hmalakna a awm hi MZP meeting chuan a dem takzet a ni." tiin a tarlang.

Hemi chungchang enzui hian MZP chuan a tul angin hma lak chhunzawm an tum a, Hetiang thil a thlen nawn loh nana hmala turin MZP chuan sorkar thuneitute a ngen a. A tul angin MZP chuan hma a la zel dawn a ni.

MZP Meeting thurel angin Buarchep leh Bairabi zophai chhehvela ramri chungchang hmalakna hrang hrangte a hmunah kala enfiah turin MZP President Pu Lalnumawia Pautu leh General Secretary Pu Jaocb Lalmuanpuia te an thawkchhuak nghal dawn bawk a ni.

MZP chuan, Mizoram sawrkarin Assam nena inbiakremna zah tak chunga hma thar la lova a awm laia Assam sawrkarin hma a la hi hriatthiam har a ti hle a, a hmunah kalchilhin endik ngei a tum a. A tul anga hmalak a tum a ni.

Mizoram ram chhung humhalh leh Zohnathlakte thlavang hauh tur hian MZP chuan theihtawp a chhuah zel an tum a ni.
--------------

Post a Comment

0 Comments