MZP-in Mizo zirlai pathum UPSC coaching sponsor dawn

• March 26 thleng form thehluh theih

• Hetah hian Google Form link dah a ni

Aizawl | March 11, 2022: Mizo Zirlai Pawl (MZP) general headquarters president Lalnunmawia Pautu chuan MZP in Mizo Zirlai Pathum UPSC coaching an sponsor tur chungchangah vawiin khan chanchinbu mite kawmin, "MZP chu zirlai pawl a nih angin zirlaite chawikan hi a ngaihpawimawh ber pakhat a ni a. Mizo zirlaite tih hmasawnna leh chawikan hi a vei leh tum ber a ni." a ti.

Mizoram hian All India Service leh Central Service a tling hi tun hnaiah a nei ta mang lova, All India Service-ah phei chuan kum 10 dawn Mizo thalai tling thar a awm tawh lo hial a ni. Mizo officer tam tak an retire mek zel a, chuvangin Mizo zirlaite nasa lehzuala tanlak a ngai a ni. Mizo zirlaite hnufualna leh tanlak a ngaih zia hi MZP chuan a vei em em a. Mizo zirlai All India Service leh Central Servicea kan tlin tlem chhan hrang hrang awmte zirchiangin a sutkian dan tur vawi tam a ngaihtuah tawh a ni

MZP chuan Mizo zirlai thluak tha leh theihna nei, tumna tak tak nei zawnchhuaha, India khawpui New Delhi a Coaching tha bera kal tir (sponsor) turin hma an la mek a. Tunah hian Vajiram & Ravi Coaching Centre N. Delhi chuan MZP tan Seat 5 lai an reserve sak tawh a. Nimahsela, sum leh pai a hautak dawn avangin MZP chuan mi pathum sponsor turin hma an la mek a ni.

MZP President chuan, "He kan hmalakna kawnga min thlawpa, thurawn tha tak tak min petu zawng zawngte chungah lawmthu kan sawi a. A bik takin Coaching Center kan thlanna kawnga theihtawp min chhuahpuitu Pu Alexander V Chongthu Addl. R.C N.Delhi chungah lawmthu kan sawi a ni." tiin a sawi.

• MZP chuan an sponsor turte hi an senso engkim an tumsak dawn!

• Kum hnih chhung kalpui tura ruahman phawt a ni ang.

• Sponsor tur thlan kawngah, UPSC Exam kalphung zulzuiin Screening Test kalpui a ni dawn a. Personal Interview uluk taka neih hnuah a titha pathumte thlan an ni ang.

• Screening Test-hi MPSC-in recruitment an kalpui ang thlap leh felfai thei ang bera kalpui tum a ni a. Technical thilah chuan MPSC-te thurawn lak a nih angin, an facility pawh hman an phalsak.

• Mizo zirlai tu pawh, Graduate tawhte tan dil theih a ni. Dilna hi Google Form hmanga kalpui tur a ni.

• Dilna hi ni 26th March, 2022 thleng hawn a ni ang a,

• 2nd April, 2022 hian Screening test neih a ni ang.

• Personal Interview hi ni 8th April, 2022 hian nei tura ruahman a ni bawk.

Form Link: https://docs.google.com/forms/d/e/1FAIpQLSdmbGVPkOQB9ELcm_DNHjRAY8Vas-7LtlwJPL4mPBS32dcx3g/viewform?usp=sf_link