Ticker

10/recent/ticker-posts

AMC in Aizawl Day atan Feb 25 pawm

• Local council thar pahnih piang dawn

Aizawl | March 11, 2022: Aizawl Municipal Corporation Board of Councillors Meeting ni 10 - 11 March, 2022 a neih chuan Aizawl Day atan Aizawl khawpui mei mit lova a din champhaphak February 25 chu a pawm.




He ni hi AMC-in kum tin ni pawimawh atana hmangin, Aizawl Day hi ropui taka hman a nih theih nan ruahmanna a siam dawn a ni.

Aizawl khawpui hi February 25, 1890 atanga vawiin thleng hian mei mit lovin kum 132 chuang a lo ding tawh a ni.

Aizawl Mayor Pu Lalrinenga Sailo kaihhruai hian kum 2022-23 chhung atana AMC budget cheng vaibelchhe 65.69 a pharh a. Budget atanga 72.29 % hi Mipui tana Development Works-ah hman a ni dawn a, a dang 1.04 % hi Office Inrelbawlna atana hman tur niin, Councillors leh Staff te hlawh leh lawmman atan 18.65 % hman a ni dawn a, Local Council member te lawmman atan 8.02 % hman a ni dawn bawk a ni. Budget hi uluk taka sawihona hun neih a nih hnuah lungrual takin member ten an pawm a ni.

Tin, Local Council thar pahnih Leitan Ramthar leh Zemabawk South din turin meeting hian thutlukna a siam bawk a. Leitan Ramthar Local Council hi Durtlang Leitan Local Council atanga indang tur niin, Zemabawk South hi Zemabawk Local Council atanga indang tur a ni dawn a ni. 

Aizawl Mayor Pu Lalrinenga Sailo chuan councillor zawng zawngte Aizawl khawpui tana an thahnemngaihna chu ropui a tih thu leh a lawm thu a sawi a, Aizawl hmasawn zelna tura theihtawp chhuah zel turin a sawm bawk a ni.
Post i hmuh dan

Post a Comment

0 Comments