Kum 1966 vawiin ni ang (1st March) ah khan MNF chuan India sawrkar awpna hnuai atanga inlakhranna thu a puang a, he thil lo irh chhuahna bul ber chu kum 1959 Mautam ṭampui mitthi thlen ṭuma India (Assam) sawrkar in Mizoram a ngaihthah luat leh Assam CM Pu Chaliha chunga lungawilohna kalzel in a hrin chhuah a ni.
Kum 1961 ah Tampui mitthi vanga Mizoram buaina chhanchhuak turin Pu Laldenga hovin *Mizo National Femine Front* din a ni a, he pawl hian Assam CM chu nasa taka kar leh dawr in theihtawp an chhuah nain Pu Chaliha an ko ei zo meuh lo. He thil hian lungawilohna piah lamah hnam anga inkhawngaihna leh tlawmpa-eksen thinlung pu chunga thukhat vuak na a rawn hring chhuak ta.
He thil in a hrin chhuah chu India awpna hnuai atanga Zalenna sual a, independent ram ni tura tharum thawh a beih a ni. Pu Laldenga khan Mizoram chhunga India sipai awmte a ruala kan hup a, kan hneh phawt chuan,Mizoram Independent flag kan zar anga, reilote-ah UNO in min recognise thuai ang tiin a thawhpui leh MNF Volunteers te kha a hmin hneh hle niin sawi a ni.
Kum 1966 March Ni khat zanlai chu Mizoram puma Sipai Camp te beih hun atan ruat lawk a ni a, a bik in Aizawl leh Lunglei phei chu chet pelh hauh lohna tura ruahmanna pawh siam a ni nghe nghe.
He zan lo thlen hma chhun lamah chuan, thutlukna dang a lo awm leh ta. Chu chu, zan lama Sipai Camp beih tum chu thulh rih tur tih a ni. Zan tira inhrilh darh vek tura ruahmanna siam a ni. Hetih laia Inbiakpawhna awm chhun chu ENG (Morse Code) hmanga thu inhlanchhawn a ni. Mahse vanduaithlak tak maiin he zan hian, chhum a zing phui ta tlat mai! Êng hmanga inbiak theih a ni ta lo. Mizoram Independent puan ruala Sipai Camp beih chu Aizawl lamin ṭhulh mahse, hmun dangah kaltlangpui a ni ta tho mai. Hetiang a nih avang hian Aizawl lamah pawh chawpchilh taka kalpui leh niin AR Camp te beih hnuhnawh niin hmun tamtak ah kangmei a chhuak a, mipui nu nau leh thalai tamtak in nunna an chan ta a ni.
Hetianga MNF ten India sipai an beih tak avang hian India sawrkar chuan rang tak in a fighter pilot chhuanvawr Squadron Leader Suresh Kalmadi leh Rajesh Pilot te chu Aizawl leh Mizoram hmun danga bomb thlak turin a rawn tir nghal a, hmun tin chu ṭah leh ha ṭhialna hmun a lo changzo ta a ni.
He 1 March hi MNF party chuan Independent puanni champha tiin hun urhsun hmanni atan an hmang thin a,inthlan dawn kum phei chuan an vaw-vung nasa zual sauh thin, mi thenkhat in hnuk-ulh ṭeuh a an hman laiin, thenkhat thung chuan nuihzat búr ah an lo ngai ve thung.
Thenkhat tan chuan he ni hi, Mizo hnam tana Ni chhinchhiah tlak a ni an tih rual in, thenkhat chuan Inbumna Ni an ti thung.
He mi hnu, Ni 3 March hi India sawrkar in Jet Fighter hmanga Mizoram a bomb ni (champha) a nih avangin MZP chuan,India sawrkar demna nipah in ZORAM NI ah puang in, hnam anga infuih tharna Ni atan an hman chhunzawm ve thung.
Mizorama bomb rawn thlak tu Suresh Kalmadi leh Rajesh Pilot te hi an hna an chawlhsan hnua Congress party zawma Union Minister hial an nih chhoh tak avangin Mizoram lama Congress party beih nan party thenkhat chuan an hmangchho ta bawk nen, Mizoram Congress party pawh an hawi ve lawl lawl a ni ber e.
CPSS ✍️ 313
Post a Comment
He post chungchanga i ngaihdan lo sawi ve rawh: