MIZO NATIONAL DAY pualin Mizoram Political History zirchiang

Aizawl | March 2, 2022: Mizoram Independent puan champha vawi 56-na Mizo National Day pualin Mizoram History zirchianna hun chu Independent puanna in, Pu C. Rochhinga Colony, Mission Vengah nizan khan hman a ni.


He hun hi Tv. V. Lalnunthara V. Thanga chuan a kaihruai a, Upa C. Chawngdinga'n hunserh a hmang a, Pi Remliani Chawngthu chuan an in a Independent puan zan a thil thlen dan chipchiar takin a sawi. 

He hunah hian Tv. K. Remruatfela paper buatsaih Mizoram Political History zirchianna chu sawihona neih a ni a. Indian Union-a Zofate rinluh kan nih dan kimchang te, Mizoram Independent declaration chanchin bulthum leh zalenna sualna kawnga kawng bumboh leh zalenna sualin Mizo hnam te zinga inpumkhatna a thlen dan te leh harsatna a thlen ve dan te a chinchhuaka zirho a ni.

Hun hmasa lama Zoram hruaitute chu ngaihdan hrang hrang nei ni ve bawk mahse ram tana rohlu an hnutchhiah te chu zahawm an tih thu sawi rik a ni a. Tun dinhmunah Independent puan leh tul tih zawnga ngaihdan siam ni lo mahse; Independent chu thinlungah a nung reng a; ei leh bara ramdangte purchaw lak reng lova economic independent hun chu a nghahhlelh awm thu tarlan a ni. Zofate rorelna hrang hrang hnuaia awm te chu engtik ni ah emaw chuan rorelna pakhat hnuaiah hruaikhawm hun a nghahhlelh awm thu sawi a ni bawk.

Tin, he hunah hian zalenna atana an nunna hlu tak hlantu hnam sipai martar te sunna neiin; Abide With Me hla tihrik anih laiin ngawi rengin minute 1 chhung an ding. Mizo National Day hmanna ah hian ram vei mi thalai leh nu leh pa mi 25 an kalkhawm.

Post a Comment

0 Comments