Lawngtlai | March 16, 2022: Vawiin khan Executive Member I/c SYS LADC Running Trophy Chess Championship 2022 chu LADC Conference Hall ah khelh tan niin, Pu L.Daniela EM Primary School changtu chuan Khuallian niin a hmanpui.
Khuallian Pu L.Daniela chuan, Covid 19 hripui leng a vanga hunrei tak infiamna buatsaih theih anih tawh loh hnuin, vawiina Running Trophy Chess Championship 2022 buatsaih theih ani chu lawmawm atih thu leh Chess Championship khel tura kal zawngte a lawmpui thu a sawi a.
Pu L.Daniela EM chuan, Chess chu infiamna changkang tak ani a, tun ai hian hmang thiam ila chu, Schoolah te hian Subject pakhatah hian dah ta ila, School naupang ten an chhawr tangkaia a rin thu sawi a. Chess chu infiamna danglam tak niin Naupang leh kum upa thlenga khelh ho theih ani a,infiamna huapzo leh thianghlim tak niin inpumkhatna tha tak siamtu a ni a ti a. Infiamna chuan Hnam a thiar lova, Vun rawng athliar lova, chuvang chuan inpumkhatna tana hmanraw tangkai tak ani a ti.
He huna thusawitu Pu C.Hrangthianga EM SYS chuan, hun rei tak, he trophy hi khel thei lova kan awm hnuin, Pathianin hun tha min siam sak a, infiammite tana kawng a lo in hawng tan leh ta chu infiammite a lawmpui thu sawiin, LADC Sorkar chuan Sports Disciplines hrang hrangte duhsak bik awm lovin a tualkhai thei ang beta tih changtlun leh hmasawn tir a, State Level mai ni lo, a aia sang zawk thlenga infiam mite an thlen chhoh zel theih nan theih tawp chhuahin hmalak zel a nih tur thu leh infiammite pawhin hmasawn zel turin tumruhna nen theihtawp chuah zel tura tan la thar sauh sauh turin a sawm nghal bawk.
He huna thusawitu dang Pu Matthews R. Laldinpuia, Secretary, Lawngtlai District Sports Committee chuan, Chess khel thinte zingah Kum upa lam an tam thin thu sawiin, kum Naupang zawkte pawh hei aia nasa in khel se a duh thu a sawi a. Infiamna ah chuan tharum hman ngaihna bik te, taksa leh thluak hman ngaihna te a awm a, Chess infiamna chu rilru leh thluak hmanga Infiamna, Infiamna thianghlim leh huapzo a nih thu sawiin, theihtawp chhuah theuh turin inkhel turte chu duhsakna a hlan a ni.
He Programe hi LDCA CVanlalruata'n kaihruaiin, report ngaihthlak niin, Mizoram puma Chess Association Members boralte Sunna hun hman ani bawk.
He hunah hi Lawngtlai District Sports Committee hruaitute pawhin telpuiin, Pu K.Hrekung MDC bakah Mizoram Chess Association atangin an telpui thei bawk a. Tin, District hrang hrang atangin Player 42 in he Running Trophy Chess Championship 2022 hi an khel dawn a, Zirtawpni, ni 18 hian a hmawr bawkna nei tura ruahman a ni.
Matthews L Ramlawt
Post a Comment
He post chungchanga i ngaihdan lo sawi ve rawh: