Khua a thal reng dawn lo!

- Zohmingthanga Zote

Mizoram sik leh sa inthlak dan hi mi pangngai chin chuan kan hre theuhin a rinawm a, khawvel hun inher zel hian kan sik leh sa inthlak dan pawh a her danglam ve thin niin a lang. Sik leh sa mil-a thlai chin chi leh Sorkar leh mi mal pawhin he mi mila ruahmanna kan siam thiam deuh deuh hi thil tul tak a ni. Thal lai November atanga March thla inkarah hian kawngpui siam te, in hmun laih leh rem te, thil chi hrang hrang ruah tui tlak hnua tih rem tawh lo tam tak a awm thin a. A hun lova chet lak hian mahni tan leh mi dang tan pawi nasa tak a thlen thin tih hi kan hriat nawn fo a ngai a ni.

In hmun laih avanga vanduaina thleng ta te, kawng siam hun loh lutuk laia siam tlo loh zia leh sum tam tak a lo thlawna a luan ral nasat thin zia te hian thin a tirim fo a, mihring nunna hialin an tuar thin phei hi chuan thin a ti ur zual hle thin. Hunbi ngaihtuah lova mahni remchan hun huna in hmun kan pawng laih ngawtin chhiatna namen lo a thlen tam tawh zia te hi rapthlak tak a ni! Ngaihtuahna hmang miah lova chet kan lak hian keimahni leh mi dang pawi nasa tak kan khawih thei tih ngaihtuah fo a tul a, keimahni avangin thenawm khawveng mutmu tuah tha thei mang lovin kan siam thei tih te hi chhut thiam a tha hle. 

Ni an sat vawl vawl a, khua a lum lai te, van lam thlira khua a thian vuk lai hian ruah sur thei tawh dawn lo tura ngai ang maia inhmakhua thiam lo leh nachang hre lo kan awm leh thin. Kum khuain ruah a sur dawn lova, kum khuain khua a thal reng dawn lo tih hi i theihnghilh lovang u. Mahni hma chauh ena mi dang hmakhua ngaihtuah tel nachang hre mang lo nih hi a Mizo lo a, kan pi leh pu te ze ken kha a ni lo. Mi dang harsatna siam lo turin kan thil tih engkimah ruahmanna siam ila, pawi a thlen tawh hnua inchhir hi a sawngsawhlawt lo tih ngaihtuah chungin ngaihtuahna eng i pu tlang teh ang u khai.