Inter College Debate Competition 2022-ah Mizoram Law College thiam ber

"Nakkum aṭang chuan, Aizawl Day Feb 25 ah veng leh mimal chawimawi phute tan AMC-in chawimawina a hlan dawn."  - Aizawl Mayor


Aizawl | March 29, 2022: Mizo Zirlai Pawl (MZP) leh Aizawl Municipal Corporation (AMC) ṭangkawp buatsaih Inter College Debate Competition 2022 chu vawiin  March 29, 2022 khan Chanmari YMA Hall-ah neih a ni a, Aizawl Municipal Corporation (AMC) Mayor Lalrinenga Sailo chuan khuallian niin hun a hmanpui.



Inter College Debate Competition 2022 ah hian K Vanlalneihpuia, Govt Mizoram Law College zirlai chu pakhatna a ni a. Pahnihna Govt Hrangbana College zirlai Beirapatha Khailo niin, pathumna hi Govt J Thankima College zirlai Lalparmawii a ni.




Aizawl Municipal Corporation Mayor Lalrinenga Sailo chuan, "Bawlhhlawh hi a sawngbawl leh tihral danah amah intodelh turin AMC in hma a la chho mek." a ti.

Nakkum aṭangin Aizawl Day hman ṭan a ni tawh dawn a, Feb 25 hi Aizawl Day atan hman ṭan tura rel a ni.

Kan bawlhhlawhte hi rangkachaka chantir kan tum a, kan hlawhtlin ṭan mek a ni.

Bawlhhlawh leitu leh a haitu tur license pek an ni a. Tuiriala kan bawlhhlawh khu thil hlu tak tak a tam mai a. Bawlhhlawh hi a sawngbawl leh tihral danah amah intodelh turin AMC in hma a la chho mek a. A hmasa ber atan, Ni 20 chhungin royalty aṭangin cheng sing hnih a lut thei a ni, a ti bawk.

Aizawl Mayor chuan, Aizawl khawpui ṭhan dan milin AMC hi a la intodelh lo deuh hlek a. Tuna kalphung tam takte duhthusam chu la ni lo mahse, dan leh dun zawm kawngah mipuite hian khua leh tui ṭha nih kan tum vek a ni, a ti bawk.

Thusawitu dang MZP President Lalnunmawia Pautu chuan, MZP chuan Mizo ram leh zirlaite ṭhatna tur a nih chuan MZP ral hi pawi a ti lo a ni. MZP Hnam humhalh turin theih tawp a chhuau ṭhin thu sawiin, Zohnahthlak hnam hrang hrangte inpumkhatna atan theihtawp a chhuah ṭhin thu sawiin, Zirlai kalkhawmte chu hnam dang nupui pasal nei lo turin a chah a. Zirlai kalkhawmte chu rambuai laia Mizoram mipuite tawrhna hre renga ram leh hnam tana theihtawp chhuah turin a chah bawk.

MZP president chuan, Mizoram in buaina namen lo a tawh laia Mizoram mipuite lo tuamhlawmtu Burma ram buaina vanga harsatna tawk mek Zohnahthlakte hre renga ṭanpui leh tuamhlawm kawnga theihtawpa hma la turin zirlai kalkhawmte a chah bawk.

MZP President hian MZP in India rama UPSC coaching institute ṭha berah Mizo zirlai pathum a thlawna zirna pek an tum thu a tarlang bawk.

He hunah hian Mizoram chhunga college 13 an tel a, Aizawl khawpui chhunga college - Govt Aizawl College, Govt Aizawl North College, Govt Aizawl West College, Govt Hrangbana College, Govt J Thankima College, Govt T Romana College, Govt Mizoram Law College, Women's Polytechnic Aizawl, Pachhunga University College, leh Aizawl khawpui pawn Govt Kolasib College, Govt Khawzawl College, Govt Saiha College leh Lunglei Government College te an ni.

He hunah hian college zirlaite hian, "Aizawl khawpui himna leh thianghlimna atan mipuiten dan kan zawm ṭha tawk a ni." tih thupui hmangin debate an nei a ni.

Post a Comment

0 Comments