Ticker

10/recent/ticker-posts

Chief minister-in Tlabung RD block pian thu puang

Aizawl the 30th March, 2022 : Chief Minister Pu Zoramthanga chuan cabinet thutlukna angin Tlabung RD block a pian thu a puang a. Tlabung RD Block puanna inkhawm hi Licheng mualah buatsaih niin, Rural Development Minister Pu Lalruatkima, Lunglei HPC Vice-Chairman Pu Lawmawma Tochhawng leh bialtu MLA Pu Nihar Kanti Chakma te an tel bawk.




Chief Minister Pu Zoramthanga chuan Tlabung RD Block chu a takin, a nih tur ang taka a kal theih nan bawhzui ngai turte bawhzui thuai a, RD department leh a kaihhnawih department dangte nen sawiho a, chak taka hmalak zui zel a nih tur thu a sawi a. Kumin chhung ngeia RD office function tir tum a nih thu a sawi. Tlabung hi lawngchawlhna hmun pawimawh, ramri dep khaw pawimawh tak a nih avangin leh la thang chauh tur a nih avangin department office hrang hrang pawh a la awm belh zel tur thu a sawi a. Tuna RD Block a puan a ni hi malsawmna nasa zawk an hmuh zel theihna tura bul tanna nise tiin duhsakna a hlan a ni.

Chief Minister chuan Special Assistance to States for Capital Expenditure hnuaiah sawrkar laipui atangin tanpuina sanction state in a hmuh atangin cheng nuai 200 Tlabung bial tan pek a nih thu sawiiin, a dang pawh pek belh tum a nih thu a sawi bawk.

RD Minister Pu Lalruatkima chuan Tlabung chu state tan hmun pawimawh tak a nih thu te, chen zelna atan humhalh a, mipui hmasawnna tur atan RD block a dah sawrkarin pawimawh a tih thu leh, chumi atana hmalak a nih chhoh dan a sawi a. Bawhzui ngai dangte theihtawpa bawhzui zel a nih tur thu a sawi bawk.

Vawiin inkhawm hi Pu Lawmawma Tochhawng, HPC Vice Chairman chuan a kaihruai a. Pu Nihar Kanti Chakma pawhin RD Block puanna programme ah hian bialtu MLA a nih angin a lawm thu a sawi a ni.

Lunglei DC Pu Kulothungan A. pawhin he hunah hian thu a sawi bawk. Rural Development Department hotute leh Lunglei district hotu engemawzat he hunah hian an tel a ni.

Chief Minister hian tukin khan Kawrpuichhuah tlawhin mipui nen inkawmna hun tawi an hmang bawk a. Kawrpuichhuah chu Mizoram tan hmun pawimawh tak a nih thu te, bungraw thlenna hmunpui, sumdawnna hmun pawimawh a nih zel theih nan khawthlang lam ami te nen inkalpawhna tur lei dawh te leh hmasawnna ruhrel pawimawh din tura ruahmanna siam a nih thu a sawi a. Hripui leng avanga hun engemawchen chhung chu duh anga hmasawnna hna thawh theih loh phah mahse tunah hri pawhin ziaawm lam a pan avangin chak zawka hna thawh theih ngei a beisei thu a sawi.

Chief Minister hian PWD EE hmunhma vawiin hian a tlawh nghal bawk a ni.


- DIPR
Post i hmuh dan

Post a Comment

0 Comments