AW! SANGA, LALNUNSANG, I LIAM TA MAW?

- Dustin Lalkulhpuia

Mite chuan, "A rui tawng thei em mai," an ti mahna che. Mahse, mite chuan tunge i nih an hre lo va, eng ang mi nge i nih an hre chuang hek lo.

"Ka ui êm mai," titu tam zawk che kha i dam laia i zu in avanga hmusit a, fiamthu thawhna atana i fiamthu thawh dan hmang thinte an ni. Anni sûnnaah che kha i lawm pawh ka ring lo: nang chu rethei tê mah ni la, mihausa thian nih aia mi dik thian nih thlang fantu kha i ni miau si a.




Thenkhat chuan, "Aw... Zu ngawlveite kha han ni lo se la chuan aw... Hetiang hi a ni lo tur! Hei ai hian a ropui tur!" an ti bawk dawn che a nia.

Thenkhat chu sum âtchilhmi an ni a, thenkhat chu ei-in âtchilhmi an ni a, thenkhat chu ran âtchilhmi an ni a, thenkhat chu lan-mawi-tumna âtchilhmi an ni a, tin, thenkhat chu zu emaw kuhva emaw meizial emaw atchilhmi an mi ve leh bawk. Inang vek kan lo ni. Thenkhat hi kan chhia leh tha hriatna (Society) hian a en hniamin a ngaizam lui mai mai chauh a ni.

A pawimawh ber chu: nun tâwi tê kan neiha thil ropui tih leh dik taka nun hi a ni zâwk.

'Dam rei' hi 'hun' (clock) hmanga teh tur a ni lo. Engmah thil ropui leh chhinchhiahtlâk ti lova kum 100 dam ai chuan thil ropui tak tia, dik taka nuna kum 30 mi niha thih chu a hlu zawk fê a, dam reina a ni zawk e. 

Mihring tam zawk hi zawng kan mak ngei e: mahni nawmsakna leh hlimna chauh hian kan thinlung a luah a - engmah thil ropui emaw tih tum chuang lo, ei a, in a, rei tak han dam ve hrim hrim hi kan chak vek a nih hi maw. 

Sanga, ni e, nang chu i danglam a ni. 

Fiamthu ropui nei reng tur chuan mite chunglama lêng nih a ngai a. Mite chunglama lêng tura i beihna kawngah hian mi tam zawkte thil pawm (principles) ang i pawm ve kher lo a nih pawhin kei chuan ka salute tho che a ni. Mafaa pawh mite chuan an principles vawn hmangin an teh a, an lo tehsual rêng tawh a nih kha.

Mi bîk nih hi mi dam rei nihna a ni, tih pawmtu ka ni miau si a, "i dam chhûng i hmang tha êm e..." tih hi ka thlahna tur che a nih a ngai ta a ni. 

Leh lawks....

Mite chuan, "Vanramah a kal dawn lo a nih hi..." an ti dawn che a... Hei... En teh! Isua dinglama an khen beh leh Isua inbiakna hre miah lote pawhin khiti ang khi chuan ani pawh kha an ti ve tho a nia. Nang chuan rawn chhâng kher suh. 

Eng pawh ni se, kan va han ngai dawn tak che em!!!

Post a Comment

1 Comments

  1. Lalnungsang chu ka ui tak zel a ni, thlamung takin chawl hahdam mawlh rawh se, a kalsan a chhungte Lalpa'n thlamuan mawlh rawh se..

    ReplyDelete

He post chungchanga i ngaihdan lo sawi ve rawh: