Transport Minister hovin DTO te meeting; lirthei khalh ten lirthei an khalh reng rengin hawihhawm taka mi dangte ngaihtuah chunga lirthei an khalh hi thil tul leh pawimawh tak a ni - Transport minister

Aizawl | February 2, 2022: Vawiin khan Transport Minister Pu T.J. Lalnuntluanga hovin District Transport Officer-te (DTO) te chu Transport Directorate Conference Hall ah an thukhawm a, Department hmasawnna chungchangte, DTO Office mamawh te leh harsatna an neih te sawiho a ni a. Meeting ah hian Transport Department Director Pu R. Lalrammawia leh Directorate a thawk senior officer te an tel bawk a ni.


Minister Pu T. J. Lalnuntluanga chuan Mizorama lirthei a pun zel thu te leh Aizawlah phei chuan in tin deuh thaw in lirthei an neih thute sawiin Transport Department hi mipui ten nen in hne hnai tak kan ni a, kan hnathawhna kawngah Department kaltlangin mipui tan engtin nge malsawmna kan nih theih ang tih hi kan ngaihtuah reng a ngai a, hemi zawngin hma kan la tur a ni tiin DTO te leh Transport Department officer te chu a fuih a. Department a thawkte chu inlungrual taka thawk thin nia a hriat thu sawiin an thawhhona tichak zawng zela hma la a thawk turin a chah bawk a ni.

Transport Minister chuan lirthei khalh a eizawngtute bakah mimal lirthei khalh ten lirthei an khalh reng rengin hawihhawm taka midangte ngaihtuah chunga lirthei an khalh hi thil tul leh pawimawh tak a ni tiin hemi kawnga hma lak a tul thu a sawi a. DTO leh Transport Department te chu hetiang zawnga ‘Driving Etiquette and Manners’ inzirtirna te chu Aizawl khawpui leh District khawpui ah te neih nise tiin a rawt a. Hemi bakah hian hetiang lam inhrilhhriatna hi Driving Licence pekchhuah dawnin neih thin nise tiin a rawt bawk a ni. Minister rawtna hi Transport Director chuan SIRD te nen tawngkawpin tihhlawhtlin an tum thu a sawi.

Minister chuan DTO te an inrelbawlna atana an mamawh te, hnathawh kawnga harsatna hrang hrang an neih te chu sawi turin a sawm a. Heng thil bakah hian Department hmasawnna tur kawng hrang hrang te sawi lan a ni bawk.

- DIPR

Post a Comment

0 Comments