Mizo film thar 'APATE' a chhuak hnai!

Aizawl | February 2, 2022: Mizo Film thar, hlauhawm lam ngainatute tana hmuhnawm tling tur, Siaha khawpui atangin 'APATE' chu a chhuak thuai dawn niin EXPLOREMIZORAM.COM chuan thu a dawng.

He film, hlauhawm lam film hi February kar hnihna lamah hian Lersia Play-ah dah an tum a ni. January 26 khan a trailer hi Youtube-ah an lo dah tawh nghe nghe a ni.

Siaha khawpui atangin Mizoram deng chhuak film hmuhnawm a chhuak dawn niin a lang.

Film trailer a kan hmuh angin a hmuhnawm hmel hle a, Duhlian tawng karah Mara tawng a inzep zeuh hriat tur a awm a, hei hi a film tihlu zualtu tur a ni a. Mara tawng an hmang tlem erawh a uiawm!

EXPLOREMIZORAM.COM in thu a dawn danin, he film hi Mara Visual Collaboration in- Kolai Pictures, Dominic Azyu Films leh Noras Production te nena tang hova an siam a ni a. A thawntu ziaktu hi Dominic Azyu niin, director pawh hi Dominic Azyu bawk a ni. Main Sponsor hi 'Soul Sound' a ni.

He film tihlu tur hian Zaithiam leh hla phuathiam John Beizachhi Phuto a inlan dawn a, amah ngainatute tan en hmaih phal chi a ni lo vang.

He film 'APATE' ah hian Youtube leh instagram lama hriat hlawh Lucy Siakhel, Feb 12-a pasal nei mai tur chu a changtunu a ni a, Andrew K Zadia chu a changtupa a ni thung. Anni bakah hian Jeremy Hnialum, Kevin Solo, Rosy Lalramthlengi, John Beizachhi Phuto, Zothai Khithie te chu inlan tur langsar niin EXPLOREMIZORAM.COM chuan thu a dawng.

He film hi Siaha khawpui leh Lungzarhtum-ah te chan a ni a, hun a duhin sum leh pai a luangral hnem hle  a ni.

Film an siam dan leh hun a duh rei chungchangah, "Harddisk leh camera a chhiat avangin duh angin kan kal chak thei lova. Mang a ang duh khawp mai" tiin Kolai Pictures chuan theihtawp chhuah-a an beihna kawngah mangan chang an neih thu EXPLOREMIZORAM.COM a hrilh.

A thawnthu:

Andrew AZ Dyutha, MPS tling thar chu an khua, Siaha lam pana a haw kawngah a thianpa, Beihmo-a rualban lo chu ram palailengah chuan a hmu nawlh mai a, hruai haw tumin a motor-ah  chuan luh tirin a phur ta a, thui vak lo an tlan hnuin Beihmo-a chuan ding tura a tih avangin a han ding a, Beihmo-a chu motor atang chuan chhuakin ram lamah chuan a kal thla ta daih mai.

Khua a thlen hnu chuan a thiante nen an awmkhawmna-ah a thil tawn chu a sawi chhuak ta a. A thiante chuan mak an ti hle mai! Beihmô-a chu thla eng emaw zat kal ta khan a lo  thi daih tawh hi a lo ni a! 

Andrew chu Beihmo thla chuan a la tibuai chhunzawm zel a. Rei lo te hnuah, thianpa nau en a a en Erick-a lah chu a accident hlauh mai. Andrew-a pawh chu misualin thah tumin an lo bei ve leh bawk.

Thil awm dan atang chuan Andrew chuan eng emaw dik lo leh felhlel a awm niin a hre ta a.!

Beihmô-a (Ka lalngo-a) kha accident ni lovin tual thi a ni thei mai ang em? Tu emaw-in thudik hriaah a duh lo a ni thei mai ang em? 

A tawpah chuan eng nge an hriat chhuah tak? Hei erawh a film en chhuah phawt a tul dawn a ni.

- H Zate