Sports Minister-in Aizawl FC Team a thlahliam

Aizawl | Feb 21, 2022: Tukin zing khan Sports Minister, Aizawl FC BoH ni bawk Pu Robert Romawia Royte kaihhruaiin Aizawl FC Bus thar 2 leh Ambulance thar 1 chu R.Dengthuama Hall kawtah AFC BoGs ten an tlangzarh a. AFC Team te Kolkatta-a I-League khel tur te Sports Minister hian a vailiam nghal bawk.


AFC bus 2 hi National Thermal Power Corporation ten an CSR Fund atanga cheng nuai 40 an rawn pek leh NECS in Cheng nuai 4 an thawh atanga Cheng nuai 44 senga lei a ni. AFC tana Ambulance thar hi Shipping Corporation of India CSR Fund atanga a thlawna dawn a ni a. Heng motor tharte hi MLA paruk, AFC BoG ni bawk Pu Lalrintluanga Sailo, Pu H.Biakzaua, Er H.Lalzirliana, Pu K.Laldawngliana leh Pu Dr Vanlaltanpuia ten a huhoin an tlangzarh a ni.

Pu Robert Romawia Royte chuan Aizawl FC kum 10 zet an lo enkawl tawh thu leh, Mizo thalaite hmakhua ngaia sum leh tha sen inhuam thawhpui tur an mamawh em em laia BoG thar duhawm tak tak an nei chu a ropui a tih thu sawiin Aizawl FC BoG ni duh dangte pawh kan sawm zel a ni a ti. Sports Minister chuan NTPC in bus 2 leina atan AFC hnena cheng nuai 40 a pek avang leh NECS in Cheng nuai 4 a thawh ve bawk chu lawmawm a ti a, Assam CM thin Sarbananda Sonowala chuan Shipping Corporation of India kaltlanga Ambulance a pek avangin lawmthu a sawi bawk.

He hunah hian Rev Lalrinawma’n hunserh a hmang a, BoG te leh AFC Head Coach Yan Law an thutawi a sawi bawk.

Post a Comment

0 Comments