Ticker

10/recent/ticker-posts

PU K.VANLALVENA'N MIZORAMA KOREAN TAWNG ZIRNA HAWN A NIH THEIH NAN HMA LAKPUI AH SOUTH KOREA AMBASSADOR SAWM

Aizawl, 11th February, 2022 : Parliament Budget Session vanga Delhia cham mek Mizoram Rajya Sabha MP Pu K.Vanlalvena leh Ambassador of the Republic of Korea to India Pu H.E.Chang Jae-Bok te chu Korean Ambassador office chamber, Shanti Path, Chanakyapuri Delhi ah nimin khan an inkawm a.




Pu Vena chuan Korean ambassador hnenah Mizo thalai tam takin Korean film leh culture te an ngaihsan thu leh an nundante an entawn nasat thu a hrilh a. Mizo thalaite zingah Korean tawng thiam chak leh zir duh mi eng emaw zat an awm thu te, Korea rama hnathawk duh tur pawh an tam a rin thute hrilhin a theih dan ang anga hma lak puiah a sawm a.

South Korean Ambassador Pu H.E Chang Jae-Bok chuan MP Pu Vena rawtna chu tih hlawhtlin ngei a tum thu hrilhin hetiang lama hma la thin Korean company te pawh lo bia a, hma a lak tur thu a hrilh a. Tun hma lama Mizoram a la hriat ngai loh thu leh Mizo thalaite zingah Korean tawng thiam chak an awm chu an tan thil lawmawm leh hmalak phurawm tak a ni tih a sawi.

Pu Vena hian Korean Ambassador hnenah hian Mizoram Calendar leh Mizo Iptechei te a hlan a. Pu Alexander V.Chawngthu MCS, Additional Resident Commissioner Delhi Mizoram House leh Pu Isaac  Rodingliana PS to MP Rajya Sabha ten Pu K.Vanlalvena hi an tawiawm a ni.

- DIPR
Post i hmuh dan

Post a Comment

0 Comments