Ticker

10/recent/ticker-posts

KOHHRANHO CHHUNGKUAA TEL HLAWKNA, PART 1

- Rick Warren

- February 23, 2022



“Kan kalkhawm hian, in rinnaa inthlamuan turin ka duh che u a, nangmahni ngei pawh inthlamuan tawn turin ka duh che u a ni.” 1 Rom 1:12

Kohhran chhungkuaa i inhman poh leh kohhranin a pek theih te i dawng chho mawlh mawlh ang. 

Kohhran chuan engnge a hlan theih che? Kohhran chhungkuaa i tel chuan thil panga hlawkna i tel ang. Vawiinah chuan thil pahnih kan zir ho ang.

*I nihna dik tak i zir chhuak ang*

Miten an nihna chu thil danglam deuh emaw ah te leh eizawnna, hausakna leh infiamna ngainat zawngah te an zawnga. An thawmhnaw hak brand ah te hial an zawng ṭhin a ni. Nimahsela Isua ta i nih tawh chuan, nihna thar hlak a pe ang che. 

Bible chuan, “Chumi avang 7chuan tu pawh Kristaa a awm a thil siamthar a lo ni a; thil hluite chu a ral ta a; ngai teh u, a lo thar ta” a ti. 2 Korinth 5:17

Isua ta i nih chinah chuan, Pathianin a chhungkuaah a pawm tawh che – kohhranah. Hemi tisa chhungkua – mi an thi a, an lo puitlinga, an kalbo emaw an inṭhen emaw ang hi a ni lo va – thlarau lama i chhungkua chu a ngheta, vanramah chatuanin a awm tawh ang. Ephesi 2:19 ah chuan, “Tunah mikhual leh mi cham mai in ni tawh lo va, mi thianghlimte nen chuan tual khat leh Pathian chhungte in ni ta zawk a ni” a ti.

*Mi dangin an thlawp tlat che*

In rel nghet tak ang hian kan in vuan nghet tlat a ni. Kohhran miten mumal taka kan inṭanpui tawnna hi awm lo se, i nunah harsatna i tawh changin tluk mai hlauh chang i nei maithei. Nangmah maia hringnun hi zawhchhuak tura duan i ni lo. Taksa, thlarau, rilru leh thinlunga ṭanpuina i mamawh a ni.

Bible chuan, “Amah [Krista] ah chuan lung rem hrang ṭheuhte rem taka chuktuahin, Lalpaah chuan biak in thianghlimah a chang zel ṭhin a; nangni pawh amahah chuan Thlarauva, Pathian awmna tura rem khawm in ni” Ephesi 2:21-22.

Kum liamtaah khan ka tu te nen remkhawm chi infiamna ka nei ṭhina. Enngnge ka thil hmuhchhuah chu? Chung remkhawm chi te chuan midang an zawm loh chuan a malkhai chuan engmah awmzia an nei lo. An inremkhawm loh chuan plastic tian vum ve mai an ni. Amaherawhchu i remkhawm chuan i ngaihtuahnaa awm ang apiang khan in i sa thei thung a ni.

Rom 1:12 ah chuan, “Kan kalkhawm hian, in rinnaa inthlamuan turin ka duh che u a, nangmahni ngei pawh in thlamuan tawn turin ka duh che u a ni.” Chuvang chuan kohhranah ka awm a ni – chuti chuan Pathian mite chuan hetiang hian an sawi rual thei ang, “I rinna chuan min ṭanpui anga, ka rinna hian a ṭanpui ang che.”

Ngaihtuah zui atan

* Isua-ah ni lo thil dangah i nihna chu tarlan chakna riau i nei ṭhin em?

* Engtiangin nge i thlarau lam chhungkua chuan i nihna dik chu Isua a ni tih i vawntlat theihnan a puih che?


* Kohhran aṭanga i bo lai leh engmah ngaihvenna pawh i hlawh loh lai han sawi teh. Eng thilin nge kohhranah hruai lut leh che? Kohhran aṭang hian ila tla hrang miah lo a nih chuan, hun khirh i tawh lai pawhin kohhranin engtin nge a thlamuan che?

[Lettu: Sangpuia]

Post i hmuh dan

Post a Comment

0 Comments