Ticker

10/recent/ticker-posts

INREMLOHNA HMUNA KHAWNGAIHNA LANTIR DAN

— Rick Warren 

— Feb 16, 2022



“Rinnaa chak lo mi chu a rinhlelhnate sawisel lovin lawm rawh u." Rom 14:1

Inpumkhatna han tih hian inantlanna tihna a ni kherlo. Pathianin amah zuitute inpumkhat tura min duhdan hi, amah ang diak diaka awm vek tur tihna lam a ni lo. Chutianga awm tura min duh anih chuan, inang tlang vekin min siam ang!

Inpumkhatna kan sawi hian, kohhrana kan ianlohna hrang hrang hian min ṭhen suh se. Eng nge pawimawh ber tih ngaihtuah chungin kan inanlohna lai hi kan inchawimawi sak zawk tur a ni: Kristan min hmangaih angin midang hmangaih hi kan zir ve anga, chutichuan a kohhranah Pathian thil tum chu kan tihlawhtling thei dawn a ni.

Kohhrana mi danglam nangmah tibuai ṭhintute ho hi engtin nge ni ang: Engtin nangmah dodal tlatute nen hian in inrem theih ang?

“Rinnaa chak lo mi chu a rinhlelhnate sawisel lovin lawm rawh u. Mi pakhatin thil engkim ei theiin a inring a, mi chak lo erawh chuan thlai chauh a ei thin. Engkim ei mi chuan a ei lo mi hmusit suh se; ei lo mi pawhin a ei mi chu sawisel suh se; Pathianin ani chu a lawm tawh alawm." Rom 14:1-3.

Kohhranah emaw khawi hmunah pawh nise inhnial buainaah chuan ngaihthlak chuh vatla, thinrim lo turin in thunun vat ang che. Engnge a chhan? Achhan chu miten engchen nge ka kal tawh tih ai chuan engtia thui nge ka la kal zel dawn tih hi an thlir tlat a ni.

Miten an harsatna an paltlang dan i hriatpui chuan, tuna an dinhmun an thlen hnuah pawh sawisel ai chuan i lawmpui zawk ang.

Mi tu emaw i hriatchian lem loh nen buaina nei ta ula, i hriatthiamloh dan deuha an awm anih pawhin ngai khawlo nghal kher suh. "He mi chungah hian engnge diklo?” tih ngaihtuah lo in. “An chuangah engnge thleng?” tih zawt zawk rawh.

Mi ṭhenkhat nungchang chu an harsatna tawh avang emaw te pawh a ni thei a ni. Mi natna neite chuan midang pawh an tina mai ṭhin. Mi rilru tu emaw in a tihnata, i chhui chian deuh chuan, a ni pawh chu lo na fo tawh tih i hre thei ang.

Mi tu emaw lainatna lantir ngai vaklo nia i hriatte kha hmangaihna lantir mamawh hliah hliah anlo ni reng thei. Inpumkhatna thlen turin, rorelna lekkawh ai chuan lainatna leh zahngaihna lantir ang che.

Mi tu emaw hlutna leh anmahni kaltlanga Pathianin thawnthu a ziak a ni tih i hriat chuan, nunna pakhat i thlak danglam ani ngawt lo va. A khawtlang huap ang pawhin danglamna i thlentir thei a ni!

Ngaihtuah zui atan

In kohhranah ngaihdan dang nei an awm hian engtin nge ilo chhan let ṭhin le?

Isuan buaina a hmachhawnin engang nungchang nge, amah hnaih ber berte zingah pawh a lantir?

In kohhranah inremlohna i neih chuan, an dinhmun hriatchian leh zual i duh a ni tih lantir turin engnge sawi theih i neih?

I nunah Krista chu ila sawmlo anih chuan, hetiang hian i ṭawngṭai thei ang: "Lalpa, ka mamawh che tih ka hrechhuak a, Pianthar ka duh a. I chungah ka sual a ni tih ka puang a, ka sualnate min ngaidam turin ka dil a che. Isu, ka Lal leh Chhandamtu ni turin ka nunah ka pawm ta che. Vawiinah hian, Ka nun zawng zawng hi ka hlan a che. I hnung zui ka duh a, ti tura min tih apiang ti turin ka inpeih e. I hmathlir, damchhan leh ka nuna thiltum te hmuh ka duh a ni. I angchhungah min pawm ve ang che. Isua hmingin ka dil a che. Amen."

Krista chu i nunah i senglut tawh a nih chuan, hetiang hian ṭawngṭai la, "Ka pa, nun hi rinna mita ka hmuh fiah theihnan min pui la. I hmathlir leh ka nuna i thiltum te ti turin ka inpeih e. Thil ropui tak tih ka tumnaah hian thil ropui tak ka beiseia ka ring che a ni. Ka nuna ruahmanna i neihah hian ka inpe a ni. Isua hmingin ka dil e. Amen."

Isua pawm tura i ṭawngṭai anih chuan, hetah hian email lo thawn la Rick@PastorRick.com. Isua nena zinkawng i zawhna turah hian thil ṭangkai tak tak a thlawna lo thawn che ka duh a ni.

[Lettu: Sangpuia]

Post i hmuh dan

Post a Comment

0 Comments