HRIPUI LENG KAR-AH HIAN

(Hetiang mite hi an awm a).

📒Remmuana Chawngthu🖊️

Hun ipik leh thawveng lo zet kan tawng zel a. Covid hri leng avanga harsatna te'n kianzai a la rel viau lo nain, Pathian khawngaihna azarah boruak manganthlak tak tak te a kiang ve hret hret zel turah ngai phawt zel teh ang. 

Keipawh ni 29.1.22 (Sat) zan khan meeting pakhatah ka tel a, vanduaithlak takin kan zinga mi a lo positive ve tlat mai a, keini chhungkua pawh ni 1-5 Feb 2022 chhungin home quarantine kan tawh ve phah a. Vanneihthlak takin sample test-ah negative result ka nei hlauh a, min contact-tu pawh Pathian zarah a dam fel tawh a, a lawmawm takzet a ni.

Chutia mahni inchhung zim tea khung han nih takah chuan, pawn a chhuah theih si loh a, broiler ar ang maiin, kan mu a, kan ṭhu a, kan ei leh tawp zel mai; mahse, kan mamawh chi hrang hrang min petu, duhsak taka min ṭanpuitu tam tak an rawn inlar ṭuk ṭuk a, a lawmawm chiang kher mai. Mite ṭhatzia a thara hmuh fiah lehzualna hun kan hmang a ni ber e. 

Thil min petute hi ziakin ka chhinchhiah thlap thlap a, ziak lo mah ila, rilruin a theihnghilh mawh tawh khawp ang. Eng nilo mah ila, keini in chhung hi kan ṭhenawm khaw vengte len luhna ber kan nih ve avangin anni hlei hlei chuan keini min khung hi hrehawm an lo ti ve emaw tih tur khawpin, kan khawhar hlauin pawn lam aṭang tein min lo kawm tak ang ṭawk ṭawk a, an va fel hlawm tak em!

Kan hri lengin engti rei nge a awh dawn a hriat si lo a, ngaihtuahna thui tak pawh sen ruk a ngai viau mai. *VLTF/LLTF (khawtlang hruaitute)'n khawtlang himna atana tha leh zung tam tak an sen lai te, hri vei leh inkhung mekte rilru buai taka an awm laiin, a sir lehlam-ah hetiang mite hi an lo awm ve thei a, insiamṭhat ngaihna lai a awm chuan mahni theih danin inher rem zel a ṭha mang e.*

_1. Mi fact & figure (mi chanchin leh nihphung dik tak) hrechiang thui si lo a, pawnlawi tak leh 'BIOS' (ṭan/awn lam nei ran) tak chunga mi chanchin lo sawi ching te._

*2. Kan mil loh zawng tak mihring an nih avanga, an sawi loh pui pui pawh an sawi anga lo sawi pung hluai ching te.*

_3. Chhung leh khat induhsak bikna (Chhungkaw feeling ti mai ang) avanga ṭan lam nei tak chunga midangte chanchin sawi ching te._

*4. Hri kai palh leh Home quarantine tawk an lo awm a, hnem leh thlamuan ahnek a, deuhsawh leh chawh tih hmel taka vanduaina tawkte chanchin lo sawi chiam ṭhin te.*

_5. Mite'n thil nih dan dik taka an sawi pawh, a dik lo zawng deuh hlek a, uar zeta midang bula lo sawi chhawng thiam te._

*6. Harsatna tawh lai taka min puitute nasa taka fak duhtawk mai lova, min pui ve lotute uar taka rêl zui chiam te.*

_7. *"Kan puih ve nasat nen, min hre chang ve lo hle mai, an la hre ve khawp ang.''* ti a, phuba lak duhna rilru put ching te._

*8. Min hmangaihtu/duhsaktute an harsat/buai ve lai a nih leh nih loh hrechiang hmasa lova, _"Harsat lai hian hmangaihtu dik an lo hriat ber mai"_ ti chiam chunga, min pui ve lotute mitsir tlat zeltu te.*

_9. *"Kan buai lai taka min puitute an nih tak kha; khawnghe nei lo chung chung pawhin, hei te hi tihsak ve teh ang"* tih tum miah lo ve leh thung tlat te._

10. Thilpeka inṭanpui chu sawi loh, vanduaina tawkte laka ṭawngkam ṭha takngial pawh seng ui tlat te.

Engpawhnise, eng lam hawi vanduaina pawh hi kan tawh theih ve reng leh kan chungah engtik lai pawha thleng thei a ni tih hre ran chungin hun i hmang zel ang u. Mite'n thil min tihsaka lawm hluam hluam ringawt loin; mite tan eng thil nge ka tihsak ve theih ang? tih rilru i pu zel ang u. 

*LO HIMIN, LO DAM ZEL RAWH U.*