Higher & Technical Minister-in Serchhip College science building thar hawng

Aizawl | February 19, 2022: Vawiin chawhnu khan Higher & Technical Education Minister Dr.R.Lalthangliana chuan Government Serchhip College-a 'Science Building' sak thar chu a hawng.


Hawnna thu sawiin, H & TE Minister, Dr.R.Lalthangliana chuan, School Education Minister ah nih lai atang khan Mizoram chu India rama Literacy rate-ah pakhatna nih tir tumin tan a lak nasat dan te sawiin, a har khawp mai a, tun thlengin Kerela chu kan la tluk thei lo va, pahnihna kan la ni reng a, pakhatna ni thei turin tan la thar zel ang u a ti a. Serchhip District chu Mizorama hmun laili tak niin Mizo tawng dik hmanna hmun nia a hriat thu a sawi a. Vawiina kan hun hman hi a pawimawh em em a, Mizorama College 30 dawn awmah tumahin A-grade an hmuh theih loh laia Serchhip Government College-in a hmu thei hi thil chhinchhiah tlak leh hmasawnna ropui tak a ni a, ka lawmpui takzet a ni a ti a bawk.


H & TE Minister chuan Administrative building, Science laboratory building chu a pawimawh em em rualin, Residence Quarters hrang hrang te, Hostel-te hi College hian campus-ah a kentel ngei ngei a ngai tih hi ka rilrua a lian ber a ni thin a. School building tha tak hnuaiah chuan kawng tin rengin zirlai naupang hian zirna lamah hma an sawn ngei ngeiin ka ring a. A tak taka zirlaite thiamna hai chhuah hi a pawimawh em em a, degree emaw certificate tha leh mark hmuh san ringawt a tawk lo, a tak taka thiamna zirlaiten an neih hi a pawimawh ber zawk chu a ni, kan thiamna hian a daihzai a ngai hle a, ani ti a.  Kristian ram kan in tih lai te, ram ralmuang kan intih laite hian Central Service lam kan nei hlei theilo ta hi kan inenfiah a ngai hle a ni chuvangin kan thil tih reng rengah taimakna, tumruhna leh thawhrimna nen i bei tak tak ang u tiin he hunah hian a sawi. 

He Science building hi Rashtriya Uchchatar Shiksha Abhiyan (RUSA.2.0) sum atanga cheng nuai 156/- senga sak a ni.
 
Pi Nazuk Kumar, IAS, Deputy Commissioner Serchhip pawhin he hunah hian thu a sawi bawk . Dr.Zarzoliana, Joint SPD chuan technical report a pe a ni.

He hun hi Pi Esther Lalruatkimi, IRS, Commissioner & Secretary, H & TE-Cum-State Project Director (RUSA) chuan a kaihruai a, Rev.VL.Nithanga chuan hunserh hmangin Pu PC.Lalremsiama, Principal, Govt.Serchhip College chuan lawmthu sawiin hun a khar a ni.


- DIPR

Post a Comment

0 Comments