HEALTH MINISTER-IN SYNOD HOSPITAL-AH OXYGEN GENERATION PLANT HAWNG

Aizawl | Feb 21, 2022: Program for Appropriate Technology in Health (PATH), Seattle, USA leh GiveIndia ten an rawn pek 800 LPM Oxygen Generation Plant, Synod Hospital, Durtlang-a mi chu vawiin chawhnu dar 3 khan Health Minister Dr. R. Lalthangliana’n ribbon chep chatin a hawng. He Oxygen Plant atana senso zawng zawng hi Google Company in an rawn tum thung a ni.


Oxygen plant hawn puala inkhawm buatsaihah Health Minister Dr. R. Lalthangliana chuan Synod Hospital chu Mizorama damdawi in hlun ber pakhat a nih bakah kum 94 hmel a hmu ta chu a lawmawm a tih thu a sawi a, Mizoram chhung mai bakah Mizoram pawn hmun hrang hrang atang pawha an pan, damlo retheite leh harsa tak takte pawhin an belh thin a ni leh an thlamuanpui a ni hi a ropui a, Pathianin he damdawi in hi mal a sawmin a awmpui tih a chiang a ni, a ti.


Health Minister chuan PSA Oxygen Plant 800 LPM Synod Hospital in an nei chu lawmawm a tih thu sawiin, Mizoramah chuan a lian berte zing a mi a ni a, damlo na zual leh oxygen mamawhtu ten dam nan an hman ngei a duhsak thu a sawi bawk. COVID-19 in harsatna tam tak min siam sak karah hian kan neih phak loh leh kan hmelhriat loh bungrua leh hmanraw tam tak kan neih phah a, kawng lehlamah chuan COVID-19 hripui lrng karah Pathianin mal min sawm a, hri kait nunna chhan kawngah pawh kan thawhrimna malsawmin a awm a ni, a ti bawk.


Corporate Social Responsibly (CSR) kaltlanga sak Mamit District Hospital chu sak zawh thuai beisei a nih thu sawiin, Serchhip District Hospital dak thatna tur cheng vaibelchhe 21 leh Kolasib District Hospital sakna tur cheng vaibelchhe 22 hmuh a nih tawh thu leh reilote ah hna tan theih inbeisei a nih thu a sawi bawk.


Health Minister hian Synod Hospital-a hman tur Oxygen Concentrator pahnih a hlan nghal a ni.


Vawiina Oxygen Plant hawnna inkhawm hi Dr Lalthakima, Director, Synod Hospital chuan a kaihruai a, PATH aiawha rawn kal Pu Nilesh Gangware, Operation Manager hnen atangin technical report ngaihthlak a ni a. Synod Moderator Rev. Dr Vanlalnghaka Ralte-in Pathian hnenah hlanna hun a hmang a, Dr John Malsawma, Medical Superintendent, Synod Hospital in lawmthu sawina hun a hmang a ni.

Post a Comment

1 Comments

  1. I read the above article and I got some different kind of information from your article about a mattress. It is a helpful article to enhance our knowledge for us. Thankful to you for sharing an article like this.Oxygen Concentrator machine

    ReplyDelete

He post chungchanga i ngaihdan lo sawi ve rawh: