Gas Company 2 hotulu ten Chief Minister hmu

Aizawl | Feb 21, 2022: Vawiin tlai dar 5 khan Chief Minister Pu Zoramthanga chu a pisa a, Gas Company 2 hotulu - Pu Gokul Swargiyari, MD Assam Gas Company Ltd. (AGCL) leh Pu Ajit Thakur, CEO Indradhanush Gas Grid Ltd. (IGGL) ten an hmu a. Heng gas company hotulu te hi Rajya Sabha MP Pu K. Vanlalvena sawmna angin Mizorama lo zin an ni a, MP pawh meeting ah hian a tel a ni.


Chief Minister chuan heng company 2 ten presentation an pek zawha, Mizoram chu gas based economy ah zawi zawia a tuhluh ve nan Roadmap siam hmasak a tul thu sawiin Mizoram hmasawn nan heng company 2 te nena thawhdunna neih chu tha nia a hriat thu a sawi.

Meeting ah hian IGCL hotute te chuan National Gas Grid, Mizorama a luh nana hma an lak dan chungchangte, hemi atan cadstral survey an buaipui mek tihchak nana Sawrkar puihna an mamawh nate leh nakin zela Aizawl leh a chhehvela pipe a eirawngbawlna gas consumer te pek theih nana City Based Gas Network din chungchangte Chief Minister an sawipui a. AGCL MD chuan Meidum a gas awm lakchhuaha hman tangkai anih theih nana an tangkai theih dante leh hemi kawnga Mizoram Sawrkar an  puih thei dante sawiin Mizoram Sawrkar chu thawhpui an duh thu a sawi. Meidum a gas awm zat azirin kawlpethaa siam nan a hman tangkai theih dan te, eirawngbalna gas pipe a consumer te pek theih dan te leh CNG a hman tangkai theih dan te niin hengte hi zau takin Gas Company hotulu ten an sawifiah a ni.

Meeting ah hian Geology & Mineral Resources Director Pu Lalthazuala leh Senior Geologist bakah Pu Vanlalduhsaka te an tel a ni.

IGGL hi Sawrkar Laipuiin Hmarchhak state khawpui zawng zawngte gas pipeline a thlunzawm hna a pe a, anni hian he hna hi thawk tanin Guwahati, Silchar leh Tripura ah te hna an tan mek a. Mizorama Gas Pipeline lo lut tur hi Tripura a Panisagar atanga lo lutin Mamit District paltlangin Aizawl alo thleng dawn a, he pipeline hi feet khat bial lian tur niin km 127 a thui a ni dawn a, Mizoram hna hi IGGL hian kumin June thla a tan hman an in beisei a ni.

Post a Comment

0 Comments